तनहुँ जलविद्युत आयोजना : एप्रोच टनेलको ब्रेकथ्रू, प्याकेज १ को कामलाई सहज हुने
भञ्ज्याङ न्यूज
तनहुँको ऋषिङ गाउँपालिका-१ काहुँशिवपुरमा निर्माणाधिन तनहुँ जलविद्युत आयोजनाको कामलाई तीब्रता दिइएको छ । १४० मेगावट क्षमताको उक्त आयोजना अन्तर्गत बाधस्थल तर्फजाने एप्रोच टनेल (पहुँच सुरुङ)को काम पुरा (ब्रेकथ्रू) गरिएको छ ।
आयोजनाको प्याकेज २ अन्तरगतको ठेकेदार कम्पनी सिनो हाइड्रोले गत माघ १ गतेबाट निर्माण शुरु गरेको पहुँच सुरुङ मार्गको काम शुक्रबार पुर भएको (ब्रेकथ्रू) आयोजना निर्देशक अच्युत घिमिरेले जानकारी गराए ।
‘३१५ मिटर लामो सुरुङ मार्ग निर्माण आफैंमा एक ठूलो सफलता हो’, निर्देशक घिमिरेले भने, ‘यस कार्यमा खटिने ठेकेदार कम्पनी, इञ्जिनियर, कर्मचारी र सम्पूर्ण कामदारहरुलाई बधाई तथा शुभकामना, अब प्याकेज १ अन्तर्गतको काम अगाडि बढाउन सहज हुनेछ ।’
सेती नदीको दाया तर्फाट निर्माण गरिएको यो सुरुङबाट नदी फर्काउने मुख्य बाँध तर्फजान सहज हुने बताइएको छ । यही मार्गको प्रयोग गरी नदी फर्काउनका लागि अर्को सुरुङ खन्ने काम अगाडि बढाइने भएको छ । सडक पुर्याउन नसकिने भएकाले आयोजनाले पहुँच सुरुङ मार्ग खनेको हो ।
आयोजनाको प्याकेज १ अन्तर्गतको निर्माण कम्पनीले गर्नुपर्ने काम सम्झौतामा ढिलाई भएपछि प्याकेज २ अन्तरगतको सिनो हाइड्रो कम्पनीले उक्त सुरुङ खन्ने काम पुरा गरेको आयोजनाले जनाएको छ ।
कोरोना संक्रमण जोखिम र निषेधाज्ञाका बीचपनि आयोजनाले आवश्यक स्वास्थ्य मापदण्ड पालना गरी कामलाई निरन्तरता दिएको छ । गत वर्षो निषेधाज्ञामा पनि आयोजनाको काम रोकिएको थिएन ।
आयोजनाको तीन वटै प्याकेजका कामलाई निरन्तरता दिइएको आयोजनाका प्रमुख घिमिरेले बताए । ‘प्याकेज १, प्याकेज २ र प्याकेज ३ का कामहरू धमाधम सञ्चालन भइरहेका छनु,’ प्रमुख घिमिरेले भने, ‘निषेधाज्ञामा काम रोकिएको छैन, सबै सुरक्षा अपनाएर कामलाई गति दिएका छौ ।’
केही समयअगाडि मात्रै सम्झौता भएको प्याकेज १ को कामका लागि निर्माण कम्पनीले आवश्यक तयारी शुरु गरेको छ । आयोजनाको मुख्य काम नदी फर्काउने, बाँध निर्माण लगायतका पहिलो प्याकेजको काम शुरु गर्न तयारी थालिएको छ । उक्त कामका लागि आयोजनाले सोङ्ग दा कर्पोरेसन, भियतनाम-कालिका कन्सट्रक्सन (प्र.) लि. नेपाल जेभीसँग सम्झौता गरेको थियो ।
भियतनामी कम्पनी र नेपाली कम्पनीका प्रतिनिधिहरू फिल्डमा खटिएका छन् । दुबै कम्पनीका गरी २५ जना पूर्वतयारीको काममा जुटेको घिमिरेले बताए । प्याकेज २ अन्तर्गतको विद्युतगृह निर्माणका लागि पनि काम भइरहेको छ । त्यसका लागि कर्मचारी र श्रमिक गरी ३७० परिचालित भएको बताइएको छ ।
प्याकेज २ को कामका लागि २५० श्रमिक क्याम्पभित्रै छन् । कोरोना जोखिम भएका कारण वरपरका केही सिमित श्रमिकमात्रै काममा परिचालन गरिएको छ । यो प्याकेजका लागि ४५ जना चिनियाँ पनि परिचालित छन् । प्याकेज २ अन्तर्गत सात भागमा एकैचोटि काम भइरहेको छ । यो प्याकेज अन्तर्गत केबुल सुरुङ खन्ने कार्य सम्पन्न गरी भूमिगत विद्युतगृह खन्ने कार्यहरूको अतिरिक्त र्सच ट्याङ्कतर्फो पहुँच सुरुङ र बाँधतर्फ जाने सेती नदीको दायाँतर्फको पहुँच सुरुङको निर्माण कार्य पुरा गरिएको छ ।
प्याकेज ३ अन्तर्गतको प्रशारणलाइन निर्माणका लागि ३० जना श्रमिक परिचालित छन् । प्रशारण लाइन निर्माणका लागि टावर फाउण्डेशनको काम जारी छ । २३ वटा टावर निर्माणका लागि काम सम्पन्न भइसकेको र दश ठाउँमा काम शुरु भइरहेको आयोजनाले जनाएको छ ।
