तनहुँका उम्मेदवारलाई चुनाव चिन्ह प्रदान, जोशीले पाए “कैची”, नेकपा एसले उम्मेदवारी फिर्ता लिएन

आसन्न आमनिर्वाचन २०७९ अन्तरगत बुधबार उम्मेदवारी फिर्ता तथा उम्मेदवारलाई निर्वाचन चिन्ह प्रदान कार्य सम्पन्न भएको छ । तनहुँका २ प्रतिनिधिसभा र ४ प्रदशेसभा सदस्यका लागि विभिन्न राजनीतिक दल तथा स्वतन्त्ररुपमा गरी ६२ जनाले उम्मेदवारी मनोनयनपत्र दर्ता गराएका थिए ।

गत आइतबार मुख्य निर्वाचन अधिकृत तथा निर्वाचन अधिकृतको कार्यालयमा प्रतिनिधिसभा र प्रदेशसभा सदस्यका लागि उम्मेदवारी दर्ता गराउने मध्ये तनहुँमा बुधबार पाँच जनाले आफ्नो उम्मेदवारी फिर्ता लिएका छन् । प्रतिनिधिसभामा उम्मेदवारी दिएका एक सहित पाँच जनाले उम्मेदवारी फिर्ता लिएका हुन् ।

तनहुँ १ मा स्वतन्त्र उम्मेदवारी दिएका विश्व वास्तोलाले उम्मेदवारी फिर्ता लिएका छन् । नेपाली कांग्रेसका पूर्व जिल्ला सचिव रहेका बास्तोला गत स्थानीय निर्वाचनमा व्यास नगरपालिकाको प्रमुखमा उठ्न चाहान्थे । पार्टीले बैकुण्ठ न्यौपानेलाई दोहोर्‍याउँदै टिकट दिएपछि असन्तुष्ट भएर बास्तोलाले पार्टी छाडेका थिए । उनी पार्टीमा वरिष्ठ नेता रामचन्द्र पौडेल निकट थिए र पौडेलले नै फोन गरेपछि बास्तोलाले आफ्नो उम्मेदवारी फिर्ता लिइएको स्रोतले बताएका छ ।

यस्तै, तनहुँ १ (१) मा स्वतन्त्र उम्मेदवारी दिएका नगेन्द्र पौडेलको पनि फिर्ता भएको छ । नेपाली कांग्रेस व्यास नगर कार्य समितिका कोषाध्यक्ष रहेका पौडेलले मनोनयन दर्ताको केही दिन अगाडी मात्रै पार्टीबाट राजिनामा दिँदै उम्मेदवारी दर्ता गराएका थिए ।

तनहुँ २(१) मा स्वतन्त्र उम्मेदवारी दिएका प्रेमकुमार श्रेष्ठ, कांग्रेस -विपी) का डा. शेषरमण न्यौपानेले उम्मेदवारी फिर्ता लिएका छन् । तनहुँ २ -२) मा जसपाबाट पूर्णबहादुर गुरुङले पनि आफ्नो उम्मेदवारी फिर्ता लिएको निर्वाचन कार्यालय तनहुँले जनाएको छ ।

तनहुँमा प्रतिनिधि र प्रदेश सभामा ६२ जनाको उम्मेदवारी परेकोमा पाँच जनाले फिर्ता लिएसँगै ६ पदका लागि ५७ जना चुनावी मैदानमा उत्रिएका छन् ।

नेकपा (एस)को उम्मेदवारी कायमै

यस्तै, नेकपा (एकीकृत समाजवादी) तनहुँको प्रदेशसभा सदस्य निर्वाचनमा एकलै होमिने भएको छ । गत आइतबार मुख्य निर्वाचन कार्यालय र निर्वाचन अधिकृतको कार्यालयमा पुगेर दर्ता गरेको ४ वटा प्रदेशसभा सदस्यको उम्मेदवारी नेकपा (एस)ले कायमै राखेको छ ।

सत्तारुढ गठबन्धन दलसँगको सहमतिमा एउटा प्रदेशसभा मागेपनि कुनैपनि पद नपाएपछि नेकपा एसले चारवटै प्रदेशसभा क्षेत्रमा उम्मेदवारी दिएको थियो ।

सत्तारुढ गठबन्धनबाट धोका भएको भन्दै आफ्नै ढंगबाट प्रदेशसभा सदस्यको उम्मेदवारी दिएको पार्टीका जिल्ला अध्यक्ष श्रीराम कार्कीले बताए। ‘हामीले गठबन्धन दलसँग एक/एकवटा प्रतिनिधिसभा र प्रदेशसभा सदस्य माग गरेका थियौं’, उनले भने, ‘२०७४ सालमा प्रतिनिधिसभा सदस्य निर्वाचित कृष्णकुमार श्रेष्ठ -किसान)लाई अन्तै व्यवस्थित गरेपछि तनहुँ-१-१) र २-२) मध्ये एउटा प्रदेश मागेका थियौं तर हामीलाई लात हानियो ।’

उनका अनुसार तत्कालिन नेकपा एमालेमा हुँदा किसानले जितेको पद वरिष्ठ नेता रामचन्द्र पौडेललाई दिइयो र जिल्लामा एकीकृत समाजवादीका लागि कुनैपनि पद दिइएन । २०७४ को निर्वाचनमा तनहुँ-१ बाट उम्मेदवारी दिएका कांग्रेसका नेता पौडेल तत्कालिन एमालेका उम्मेदवार किसानसँग ६ हजार ८०२ मतान्तरले पराजित भएका थिए । अहिले सत्तारुढ गठबन्धनबाट पौडेल तनहुँ-१ र किसान बारा ४ मा चुनाव लड्दैछन् ।

जिल्लामा गठबन्धन अधकल्चो भएको बताउँदै कार्कीले पार्टीका तर्फाट चारवटै प्रदेशसभा क्षेत्रमा उम्मेदवार रहेको र पार्टीका उम्मेदवारका पक्षमा मत मागिने बताए। उनले भने, ‘प्रदेशसभा सदस्यमा आफ्नै पार्टीका उम्मेदवार भएकाले मत पनि पार्टीकै लागि मागिनेछ । प्रतिनिधिसभा सदस्यको हकमा के गर्ने भन्ने छलफल भइरहेको छ ।’

नेकपा एसबाट तनहुँ-१(१) मा विद्यानाथ ढकाल, तनहुँ-१(२) मा कलिला खान, तनहुँ-२(१) मा दुर्गाकुमार श्रेष्ठ र तनहुँ-२(२) मा प्रतापलाल श्रेष्ठ उम्मेदवार बनेका छन् । सत्तारुढ गठबन्धनबाट भने प्रतिनिधिसभा सदस्यतर्फतनहुँ-१ बाट नेपाली कांग्रेसका वरिष्ठ नेता रामचन्द्र पौडेल र तनहुँ-२ मा नेपाली कांग्रेसका शंकर भण्डारी उम्मेदवार बनेका छन् ।

त्यस्तै, तनहुँ-१(१)मा नेपाली कांग्रेसका अशोककुमार श्रेष्ठ, १ (२) मा माओवादी केन्द्रका हरिबहादुर चुमान, तनहुँ-२(१) मा माओवादी केन्द्रका राजेन्द्रकेशरी न्यौपाने र २ (२) मा नेपाली कांग्रेसका जितप्रकाश आले उम्मेदवार बनेका छन् ।

जोशीको चुनाव चिन्ह ‘कैची’

मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि तनहुँ-१ का उम्मेदवार गोविन्दराज जोशीले कैची चुनाव चिन्ह पाएका छन् । स्वतन्त्र रुपमा उम्मेदवारी दर्ता गरेका जोशीले कैची चुनाव चिन्ह पाएका हुन् ।

मुख्य निर्वाचन अधिकृतको कार्यालयले जोशीलाई कैची चुनाव चिन्ह प्रदान गरेको हो । गत स्थानीय तह निर्वाचनमा जोशीका छोरा दीपकराज जोशीले व्यास नगरपालिकाको प्रमुखमा कैची चुनाव चिन्ह लिएका थिए । त्यसबेला नेकपा एमालेले जोशीलाई समर्थन गरेको थियो ।

नेपाली कांग्रेसका पूर्व सहमहामन्त्री समेत रहेका जोशी तनहुँ-१ बाट प्रतिनिधि सभा सदस्य निर्वाचनमा प्रतिस्पर्धा गर्ने यसअघिदेखि नै बताउँदै आएका थिए । यही क्षेत्रबाट नेपाली कांग्रेसका वरिष्ठ नेता रामचन्द्र पौडेल, नेकपा एमालेका केन्द्रीय सल्लाहकार सदस्य एकबहादुर राना चुनावी मैदानमा छन् ।

यस्तै, तनहुँ क्षेत्र नम्बर १ का प्रतिनिधिसभा सदस्य रामचन्द्र कार्कीले चुनाव चिन्ह ‘ट्राफिक प्रहरी’ पाएका छन् । मुख्य निर्वाचन अधिकृतको कार्यालयले कार्कीलाई ‘ट्राफिक प्रहरी’ चुनाव चिन्ह दिएको हो । चुनाव चिन्ह पाएपछि कार्कीले व्यवस्था परिवर्तन भएपनि अवस्था परिवर्तन नभएकाले आफू उम्मेदवार बनेको बताए ।

यस्तै, स्वतन्त्र उम्मेदवार पृथ्वी नारायण श्रेष्ठले सूर्यमुखी फूल र बेलबहादुर दरैले क्रस खुकुरी चुनाव चिन्ह पाएका छन् । मुख्य निर्वाचन अधिकृतको कार्यालयले स्वतन्त्र उम्मेदवारलाई बुधबार साँझ चुनाव चिन्ह प्रदान गरेको हो ।

सेयर गर्नुहोस्

प्रतिक्रिया दिनुहोस्

सम्बन्धित खवर