भानुको थानीमाईमा ३६ फूलको डोली भित्रियो

तनहुँको भानु नगरपालिका-७ बसन्तपुर स्थित थानीमानई मन्दिरमा मंगलबार ३६ फूलका डोली भित्रिएका छन् । मंसिर महिनाको पहिलो मंगलबार प्रसिद्ध धार्मिक तीर्थस्थल थानीमाइ मन्दिरमा फूलको डोली सहित भक्तजनहरु पुगेका छन् ।

मन्दिर संरक्षण समितिका अध्यक्ष जीवन थापाका अनुसार मंगलबार तीन हजार २४० भक्तजनले मन्दिरमा पूजाआजा गरेको बताएका छन् । सोमबार तीन सय पाँच जनाले रातभर जागाराम बसेर बत्ती बालेको उनले बताए ।

फूलको डोली भित्र्याउन तनहुँ, कास्की, लमजुङ, गोरखा लगायतका ठाउँबाट सर्वसाधारण मन्दिरमा पुग्ने गर्दछन् । ‘मन्दिरमा विशेषगरी कात्तिक र मंसिर महिनाको मंगलबार धेरै फूलको डोली भित्रिन्छ । यो पटक कात्तिकमा दसैं र तिहार पर्दा कात्तिकमा कम डोली भित्रियो’, अध्यक्ष थापाले भने, ‘मन्दिरमा कात्तिक महिनाको मंगलबार एक सय ६१ फूलका डोली भित्रिएका थिए ।’

सोमबार सत्यनारायणको पूजा गरी फूलको डोली तयार गर्ने र थानीमाई मन्दिरमा चढाउने परम्परा रहँदै आएको छ । मन्दिरमा साउन महिना, एकादशी र औंशी तिथि बाहेकका मंगलबारका दिन पूजाअर्चना हुँदै आएको छ ।

प्रत्येक वर्ष कात्तिक, मंसिर, माघ र फागुन महिनाको मंगलबार थानीमाई मन्दिरमा देशका विभिन्न ठाउँबाट आएका भक्तजनले फूलको डोली चढाउने गर्दछन् । मन्दिरमा फूलको डोली चढाउनाले मनको इच्छा पूरा हुने धार्मिक विश्वास रहिआएको छ ।

भक्तजनहरू फूलको डोली र पञ्चैबाजासहित थानीमाई मन्दिरको तीनपटक नाचगान गर्दै परिक्रमा गर्दछन् । परिक्रमापछि माथि थुम्कामा रहेको मन्दिर परिसरमा रहेका देवलहरूमा डोलीसँगै लगिएको तोरणलाई तीन फन्का घुमाएर बाँध्ने गरिन्छ । त्यसपछि मन्दिरभित्र प्रवेश गरी आफ्नो मनोकामना भाकल पूरा भएको भन्दै पूजा अर्चना गरिन्छ । बाजागाजा र ध्वजापताकासहित थानीमाईको जयजयकारले बसन्तपुर क्षेत्र गुञ्जिने गरेको छ ।

समुन्द्र सतहबाट एक हजार दुइ सय मिटर उचाइमा अवस्थित यहाँबाट गोरखाको लक्ष्मी बजार, लिगलिग कोट, पालुङटार, राइनासकोट लगायत हिमश्रृंखला अवलोकन गर्न सकिन्छ । विसं २०७२ साल वैशाख १२ गतेको भूकम्पबाट क्षति पुगेको मन्दिरको पुनःनिर्माण गरिएको छ । संस्कृति, पर्यटन तथा नागरिक उड्डयन मन्त्रालयबाट प्राप्त रु १४ लाख र मन्दिरको भेटीबाट संकलित रु ६ लाख गरी रु २० लाखको लागतमा मन्दिरको पुर्ननिर्माण गरिएको थियो ।

विसं १८२५ सालबाट यस मन्दिरमा पूजाअर्चना शुरु भएको स्थानीय बताउँछन् । विसं १८२५ सालमा मन्दिर भएको ठाउँमा भोटीनी आमाछोरी हावाहुरी चलेपछि एक रुखमा ओत लाग्दा त्यहाँबाट अर्न्तध्यान भएको किंवदन्ती रहेको र सोही समयदेखि नै उक्त स्थानमा पूजाअर्चना शुरु भएको बताइन्छ ।

सेयर गर्नुहोस्

प्रतिक्रिया दिनुहोस्

सम्बन्धित खवर