बन्दीपुर अस्पतालमा नियमितभन्दा अतिरिक्त ओपीडी सेवामा उल्लेख्य सहभागिता
बन्दीपुर : तनहुँको बन्दीपुर गाउँपालिका–४ स्थित बन्दीपुर अस्पतालमा नियमितभन्दा अतिरिक्त समयको ओपीडी सेवामा सेवाग्राहीको सहभागिता उल्लेख्य रहेको छ । अस्पतालले शुक्रबार सर्वाजनिक गरेको पुस महिनाको तथ्याङ्कमा एक हजार आठ सयभन्दा बढी सेवाग्राहीले ओपीडी सेवा लिएका छन् ।
अस्पतालले सार्वजनिक गरेको विवरणअनुसार पुस महिनामा कुल १ हजार ८५१ जना बिरामीले ओपीडी सेवा लिएका छन् । अस्पतालका अनुसार कुल सेवाग्राहीमध्ये १ हजार १५० जना (६२.४ प्रतिशत) ले नियमित ओपीडी सेवा लिएका छन् भने ६९१ जना (३७.६ प्रतिशत) ले अतिरिक्त ओपीडी सेवा उपयोग गरेको अस्पतालका प्रमुख डा. अनिल गिरीले जानकारी गराए ।
उनका अनुसार अतिरिक्त ओपीडी सेवामा पनि उल्लेख्य संख्यामा बिरामीको उपस्थिति देखिएको छ । अस्पतालले कर्मचारी वर्ग, विद्यार्थी, ज्याला/मजदुरी गर्ने वर्ग, व्यापारी तथा गृहिणीहरूलाई लक्षित गर्दै विस्तारित सेवा समयसहित स्वास्थ्य सेवा प्रवाह गर्दै आएको छ ।
सार्वजनिक बिदा र शनिबारसमेत बिहान ७ बजेदेखि बेलुकी ६ बजेसम्म (कात्तिक १६ गतेदेखि बेलुकी ५ बजेसम्म) निःशुल्क ओपीडी सेवा सञ्चालन भइरहेको अस्पतालका प्रमुख डा. गिरीले जानकारी दिएको छ।
नियमित ओपीडी सेवा कार्यालय खुलेका दिन बिहान १० बजेदेखि दिउँसो २ बजेसम्म टिकट काटी सेवा लिने व्यवस्था गरिएको छ। अतिरिक्त ओपीडी सेवा भने कार्यालय खुलेका दिन बिहान ७ बजेदेखि १० बजेसम्म र दिउँसो २ बजेदेखि बेलुकी ५ बजेसम्म उपलब्ध छ। सार्वजनिक बिदाका दिनसमेत बिहान ९ बजेदेखि बेलुकी ६ बजेसम्म सेवा सञ्चालन गरिएको छ ।
अस्पताल प्रशासनका अनुसार ओपीडी सेवामा देखिएको बिरामीको चापले स्थानीय तहमा स्वास्थ्य सेवाप्रति नागरिकको पहुँच र विश्वास बढ्दो रहेको संकेत गर्छ । गाउँमै गुणस्तरीय सेवा उपलब्ध हुँदा जिल्ला बाहिर जानुपर्ने बाध्यता घट्दै गएको बताइएको छ ।
अस्पतालको उक्त विवरणमा इमर्जेन्सी विभागबाट सेवा लिएका बिरामीको संख्या समावेश गरिएको छैन । अस्पतालले आगामी दिनमा समेत सेवा विस्तारलाई निरन्तरता दिँदै नागरिकलाई सहज र प्रभावकारी स्वास्थ्य सेवा उपलब्ध गराउने जनाएको छ ।
