व्यास नगरपालिकाद्वारा ८८४ जना ज्येष्ठ नागरिकको निःशुल्क आँखा परीक्षण
भञ्ज्याङ समाचारदाता/दमौली
तनहुँको व्यास नगरपालिकाले आयोजना गरेको निःशुल्क आँखा शिविरबाट करिब नौ सय ज्येष्ठ नागरिक लाभान्वित भएका छन् । तीन दिनसम्म आयोजित शिविरबाट नगर क्षेत्रभित्र बसोबास गर्ने आठ सय ८४ ज्येष्ठ नागरिक लाभान्वित भएका छन् । नगरपालिकाले बिहीबारदेखि शनिबारसम्म दमौलीस्थित बाल मन्दिर माध्यमिक विद्यालयमा हिमालय आँखा अस्पताल पोखराको प्राविधिक सहयोगमा आँखा शिविर आयोजना गरेको थियो । शिविरमा चार सय ५९ महिला र चार सय २५ पुरुषको आँखा परीक्षण गरिएको व्यास नगरपालिकाका प्रमुख प्रशासकीय अधिकृत डिल्लीराम सिग्देलले जानकारी दिनुभयो ।
व्यास नगरपालिका-१ का ४५ महिला र ३६ पुरुष, व्यास नगरपालिका-२ का एक सय १३ महिला र ८९ पुरुष, व्यास नगरपालिका-३ का ४४ महिला र ३५ पुरुष, व्यास नगरपालिका-४ का ४५ महिला र ३४ पुरुष, व्यास नगरपालिका-५ का २८ महिला र २५ पुरुष, व्यास नगरपालिका-६ का २६ महिला र २९ पुरुष, व्यास नगरपालिका-७ का आठ महिला र चार पुरुषको आँखा परीक्षण गरिएको छ ।
यसैगरी व्यास नगरपालिका-८ का सात महिला र २९ पुरुष, व्यास नगरपालिका-९ का ३३ महिला र १९ पुरुष, व्यास नगरपालिका-१० का २० महिला र २९ पुरुष, व्यास नगरपालिका-११ का २४ महिला र २२ पुरुष, व्यास नगरपालिका-१२ का २५ महिला र २६ पुरुष, व्यास नगरपालिका-१३ का २९ महिला र ३१ पुरुष, व्यास नगरपालिका-१४ का १६ महिला र १७ पुरुषले आँखा परीक्षण गराएको नगरपालिकाले जनाएको छ ।
त्यसमध्ये २१ महिला र २१ पुरुष गरी ४२ जनामा मोतियाविन्दु देखिएकाले उनीहरूको नगरपालिकाले नै निःशुल्क शल्यक्रिया गराइदिने प्रमुख प्रशासकीय अधिकृत सिग्देलले बताउनुभयो । शिविरमा हिमालय आँखा अस्पतालका डा धर्मेन्द्र घोरासैनी नेतृत्वको टोलीले ज्येष्ठ नागरिकको आँखा परीक्षण गरेको थियो । उमेर ढल्किँदै जाँदा आँखासम्बन्धी समस्याका कारण कठिनाइ भोग्न नपरोस् भन्ने उद्देश्यले सबै वडा समेटिने गरी शिविर सञ्चालन गरिएको सिग्देलले बताउनुभयो । “ढल्ँिकदो उमेरसँगै आँखाको ज्योति कमजोर हुन्छ । ज्येष्ठ नागरिकका सामान्य दैनिकी समेत प्रभावित हुने हुँदा शिविर आयोजना गरेका हौँ,” उहाँले भन्नुभयो, “शिविर प्रभावकारी भएको ठहर गरेका छौँ ।”
