तनहुँका उद्योगमा लगानी र रोजगारी बढ्यो

तनहुँमा उद्योगको संख्या, लगानि बढेसंगै रोजगारीमा समेत वृद्धि भएको छ । आर्थिक वर्ष २०७७/०७८ मा जिल्लामा दर्ता भएका उद्योगमा दुइ अर्ब ७० करोड ९० लाख रुपैयाँ लगानी भएको घरेलु तथा साना उद्योग कार्यालय तनहुँले जनाएको छ । सो अवधिमा दुइ हजार एक उद्योग दर्ता भएका कार्यालयको तथ्याङ्कमा उल्लेख गरिएको छ । गत आर्थिक वर्षमा जिल्लामा तीन हजार ५१५ उद्योग थपिएका थिए । ती उद्योगमा एक अर्ब ८९ करोड ५२ लाख ६० हजार ६५९ रुपैयाँ लगानी भएको थियो । आव २०७६/७७ भन्दा आव २०७७/७८ मा उद्योग दर्ता संख्या घटे पनि लगानी भने वृद्धि भएको कार्यालयका प्रमुख नारायण ढकालले बताए ।

एक वर्षको अवधिमा जिल्लामा कृषि तथा वनजन्य उद्योग सबैभन्दा बढी दर्ता भएको छ । कृषि तथा वनजन्यतर्फ एक हजार २१९ उद्योग दर्ता भएका छन् । गत वर्ष कृषि तथा वनजन्यतर्फ ६०० मात्रै उद्योग दर्ता भएका थिए । कृषि र पशुपालनमा युवाको आकर्षण बढेसँगै कृषिसम्बन्धी उद्योग दर्ता वृद्धि भएको उनले बताए ।

‘कोरोना कहरका कारण वैदेशिक रोजगारीबाट फर्किएका युवाले गाउँमै उद्यम शुरु गरेका छन्’, उनले भने, ‘कृषि तथा वनजन्यतर्फ दुग्ध डेरी, गाइपालन, बाख्रापालन, कुखुरापालन, मौरीपालन, माछापालन, तरकारी खेतीतर्फ आकर्षण बढ्दो छ ।’ यसैगरी उत्पादनमूलकतर्फ १२९, निर्माणतर्फ १९, पर्यटनतर्फ ३२३ र सेवामूलकतर्फ ३११ उद्योग दर्ता भएका छन् । दर्ता भएका उद्योगको वार्षिक उत्पादन क्षमता रु एक अर्ब २६ करोड १० लाख २६ हजार ३७४ रहेको छ ।

पाँच हजारलाई रोजगारी, ६६ लाख राजश्व संकलन

दुइ हजार एक उद्यमी बन्दा ती उद्योगले पाँच हजार ८१५ लाई रोजगारी दिएको छ । रोजगारी पाउनेमा दुइ हजार ८३५ महिला र दुइ हजार ९८० पुरुष छन् । यसैगरी कार्यालयले रु ६६ लाख ३१ हजार ७५० राजश्व संकलन गरेको छ । उद्योग दर्तामार्फत रु ३७ लाख ७७ हजार ७००, पुँजीवृद्धिमार्फत रु सात लाख ८० हजार ५०० र अन्यमार्फत रु २० लाख ७३ हजार ५५० राजश्व संकलन भएको छ ।

रु एक लाखसम्म पूँजी भएको उद्योगले रु एक हजार १००, तीन लाखसम्म पूँजी भएको उद्योगले रु तीन हजार १००, रु पाँच लाखसम्म पूँजी भएको उद्योगले रु छ हजार १००, रु ५० लाखसम्म पूँजी भएको उद्योगले रु १२ हजार १००, रु एक करोडसम्म पूँजी भएको उद्योगले रु २० हजार १००, रु पाँच करोडसम्म पूँजी भएको उद्योगले रु ३० हजार १०० र रु पाँच करोडभन्दा माथि पूँजी भएको उद्योगले रु ५० हजार ११० दर्तावापत शुल्क बुझाउनुपर्छ ।

कार्यालयमा सोही अवधिमा ७२१ उद्योग नवीकरण, १३८ उद्योग नामसारी, ११ उद्योग ठाउँसारी र १२४ उद्योगले उद्देश्य थप गरेका छन् । ८५ उद्योगले लगत कट्टा, १४६ उद्योगले सुविधा सिफारिश, १८८ उद्योगले प्रतिलिपि र १४४ ले पूँजी वृद्धि गरेका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर