दुइ पालिकाको लगानीमा मितेरी पुल

तनहुँको शुक्लागण्डकी नगरपालिका-७ र म्याग्दे गाउँपालिका-५ साउनेपानी जोड्ने मोटरेवल मितेरी पुलको निर्माण कार्य शुरु भएको छ। दुइ स्थानीय सरकारको लगानीमा बन्न लागेको पुलको विहीबार शिलान्यास गरिएको छ । शुक्लागण्डकी नगरपालिकाका प्रमुख किसान गुरुङ र म्याग्दे गाउँपालिकाकी अध्यक्ष मायादेवी रानाले पुलको संयुक्त रुपमा शिलान्यास गरेका हुन् । पुल शिलान्यस समारोहमा शुक्लागण्डकी नगरपालिकाका प्रमुख गुरुङले यो पुलले दुइ पालिकाबीचको सम्बन्धलाई प्रगाढ बनाउने बताए । उनले पुल निर्माण भएपछि म्याग्देवासीले सुविधा पाउने र शुक्लागण्डकीका व्यवसायीले उपभोक्ता पाउने भन्दै पुल समयमै सक्न सबैले चासो र सहयोग गर्नुपर्नेमा जोड दिए ।

त्यस्तै, म्याग्दे गाउँपालिका अध्यक्ष रानाले दुइ पालिकाको लगानीमा बन्ने पुलको शुभारम्भ गर्न पाउँदा गर्व लागेको बताइन् । उनले म्याग्दे-५ का वडावासीका लागि आउजाउ गर्न पुल अत्यन्त आवश्यक देखिएको भन्दै बाहिरबाट हेर्दा कुम्लेखोलाको पुल र दोभानको पुलको बीचमा देखिए पनि व्यवहारत पुल बनाउनै पर्ने देखिएकाले पुल निर्माणको थालनी गरिएको अध्यक्ष रानाको भनाई छ । म्याग्देको आग्रहमा शुक्लागण्डकी नगरपालिका साझेदारीमा काम गर्न तयार भएको भन्दै उनले नगरपालिकाप्रति हार्दिकता प्रकट गरिन् ।

गाउँपालिकाका उपाध्यक्ष बालकृष्ण घिमिरेले जुनसुकै निर्माण कार्यमा ठेकेदारले दुःख दिने, समयमा काम नसक्ने र सम्पर्कविहिन भइदिने समस्या रहेको भन्दै यस योजना समयमै सक्न निर्माण कम्पनीलाई निर्देशन दिए । उनले यसअघिका योजनाहरु अधुरै छाडेर बेपत्ता भएका निर्माण व्यवसायीलाई प्रशासन लगाएर समातिएको घट्ना सुनाउँदै उपाध्यक्ष घिमिरेले पुल निर्माणको विषयमा उपभोक्ताले पनि ध्यान दिनुपर्ने बताए ।

कार्यक्रममा शुक्लागण्डकी-७ का वडाध्यक्ष रामबहादुर क्षेत्री थापा, म्याग्दे-५ का वडाध्यक्ष शिवबहादुर आले, वडा नं ६ का वडाध्यक्ष बसन थापा मगर लगायतले काम समयमै सक्न सबैले आ आफ्नो ठाउँबाट सहयोग एवं निग्रानी गर्नुपर्ने बताए ।

स्थानीय खुमबहादुर राइले मोटरेवल पुल नहुँदा धेरै समस्या भएको बताए । उनले विरामी हुँदा अस्पताल लैजान, बच्चाहरुलाई स्कुल पठाउन, सामान ढुवानी गर्न, उत्पादित कृषि उपज विक्री वितरण गर्न बोकेरै लैजानुपर्ने बाध्यता रहेको गुनासो गरे । पुल बन्ने भएपछि स्थानीयमा खुसियाली छाएको छ । उनका अनुसार यस पुलबाट साउनेपानी, भुलभुले, बौलाहा ओढार लगायतका सयौँ घरधुरीका बासिन्दा लाभान्वित हुने भएका छन् ।

प्राविधिकले पुलको कुल लागत २ करोड १२ लाख इस्टिमेट गरे पनि कम्पनीसंग एक करोड ४० लाख ४३ हजार १४५ रुपैयाँमा सम्झौता भएको छ । कुल लागतमा शुक्लागण्डकी नगरपालिकाले ७० लाख २१ हजार ५७२ रुपैयाँ र म्याग्दे गाउँपालिकाले पनि ७० लाख २१ हजार ५७२ रुपैयाँ व्यहोर्ने सहमती भएको वडा नं ५ का वडाध्यक्ष शिवबहादुर आलेले जानकारी दिए । उनका अनुसार शुक्लागण्डकीले ५० लाख रुपैयाँ विनियोजन गरिसकेको छ । पुल निर्माणको ठेक्का काश्यप निर्माण सेवा एण्ड सप्लायर्स कलङ्की काठमाडौँले पाएको छ । उक्त पुल आगामी बर्ष२०७९ मंसिर ०५ गतेसम्म निर्माण कार्य सम्पन्न गर्नुपर्ने छ । पुल बक्स कल्भर्ट डिजाइनमा बन्ने छ ।

सेयर गर्नुहोस्

प्रतिक्रिया दिनुहोस्

सम्बन्धित खवर