राष्ट्रपति भएपछि गृहजिल्ला आएका पौडेलले भने : दलीय राजनीतिमा हात हाल्दिन, विकासबाट झिक्दिन
भञ्ज्याङन्यूज
राष्ट्रपतिमा निर्वाचित भएपछि पहिलोपटक गृहजिल्ला तनहुँ आइपुगेको राष्ट्रपति रामचन्द्र पौडेलले दलीय राजनीतिमा हात नहाल्ने बताएका छन् ।
तनहुँको भानु नगरपालिका-१३ मिर्लुङकोट स्थित मिर्लुङ भयर ठाकुर (भयरथान) मन्दिरको शनिबार दर्शन गरी सदरमुकाम दमौली स्थित व्यास नगरपालिका-३ बिपी वनवाटिकामा नवनिर्मित दमौली सभागृहको उद्घाटन गर्न आइएको राष्ट्रपति पौडेलले दलीय राजनीतिमा हात नहाल्ने र विकासबाट हात नझिक्ने प्रतिवद्धता जनाएका छन् ।
‘देशलाई विकास चाहिएको छ, देश पछाडि परेको छ । विकासका लागि म जहाँ पनि बोल्छु, सबैलाई सचेत गराउँछु’ उनले भने, ‘सुशासन र विकासका लागि सचेत गराउनु आफ्नो जिम्मेवारी हो र विकास नै मेरो पहिलो शर्त रहनेछ ।’
‘संविधानको रक्षा गर्नु सबैको दायित्व हो’, उनले भने, ‘परिवर्तनको रक्षा गर्ने मेरो जिम्मेवारी हो । संविधानको रक्षक भएको नाताले मेरो कदम त्यसतर्फहुनेछ ।’
स्थायीत्व र सुशासनबाट विकास सम्भव रहेको बताउँदै राष्ट्रपति पौडेलले सबै धर्म र जातजातिको सम्मान गर्नुपर्ने र देशलाई बलियो बनाउनेतर्फलाग्न सबैलाई आग्रह गरेका छन् ।
उनले व्यवस्था बदलिए पनि अवस्था नबदलिएको भन्दै पदमा पुग्नेहरुले देशको हितमा काम गर्नुपर्नेमा जोड दिए । ‘अति दलबन्दीले निमुखाको न्याय मर्छ’, राष्ट्रपति पौडेलले भने, ‘निमुखा जनताले न्याय पाउनुपर्ने र विपन्नलाई आय चाहिएको छ । दलहरु मिलेर आपसमा सहकार्य गरेर राष्ट्रिय एकतामा मिलेर काम गर्नुपर्ने अहिलेको आवश्यकता हो ।’
राष्ट्रपति पौडेलले दलहरु मिले मात्रै मुलुक बलियो बन्ने बताएका छन् । उनले भने, ‘दुइ ठूला छिमेकी देशका बीचमा रहेको नेपाललाई एकताको बाटोमा हिँडाउनुपर्छ र सबै दल मिले मात्रै देश बलियो बन्छ ।’
दमौली सभाहल उद्घाटन समारोहमा शहरी विकास मन्त्री सीता गुरुङले सरकारले पूर्वाधार निर्माणलाई प्राथमिकता दिएको बताइन् । उनले सबैको पहुँच पुग्ने गरी गुणस्तरीय भवन समयमै बनाउनु पनि सरकारको दायित्व भएको बताइन् ।
कार्यक्रममा गण्डकी प्रदेशका प्रमुख पृथ्वीमान गुरुङ, गण्डकी प्रदेशका मुख्यमन्त्री सुरेन्द्रराज पाण्डेले सीमित स्रोत र साधनबाट पूर्वाधार विकासमा जोड दिइएको बताए । यो देशमा केही हुन सक्दैन भन्ने भाष्य स्थापित गर्न खोजिएको बताउँदै मुख्यमन्त्री पाण्डेले नैराश्यताको फाइदा उठाएर गलत काम गर्नेहरुलाई परास्त गर्नुपर्नेमा जोड दिए ।
उक्त कार्यक्रममा तनहुँ क्षेत्र नम्बर १ का प्रतिनिधिसभा सदस्य डा. स्वणिर्म वाग्ले, तनहुँ क्षेत्र नं. २ का प्रतिनिधिसभा सदस्य शंकर भण्डारी, काठमाडौं क्षेत्र नं. ५ का प्रतिनिधिसभा सदस्य प्रदीप पौडेल, राष्ट्रियसभा सदस्य भगवती न्यौपाने, प्रकाश पन्थ लगायतले कुशासनले विकास रोकिएको चर्चा गर्दै असमझदारीले मुलुक पछाडि परेकाले सबै दलबीच एकता आवश्यक रहेको धारणा व्यक्त गरेका थिए ।
सांसदहरुले विकास निर्माणका काम समयमा नहुने प्रवृत्तिको अन्त्य हुनुपर्नेमा जोड दिंदै समृद्ध तनहुँका लागि सबै राजनीतिक दलबीच सहकार्य आवश्यक रहेको बताउनु भएको छ ।
यस्तै, शहरी विकास मन्त्रालयको २३ करोड ६२ लाख रुपैयाँको लागतमा दमौली सभागृह निर्माण भएको मन्त्रालयका सचिव रवीन्द्रमान श्रेष्ठले जानकारी गराए ।
विसं २०७४ माघ २८ गतेदेखि निर्माण शुरु भएको भवन कोरोना महामारीका कारण ढिलो गरी निर्माण सम्पन्न भएको हो । भवन निर्माणका लागि विसं २०७७ असार १५ गतेभित्र सम्पन्न गर्ने गरी काठमाडौस्थित डाँफे/एमए/प्रतिष्ठा जेभीले ठेक्का पाएको थियो ।
सभाहल निर्माण सम्पन्न भएको मितिदेखि एक वर्षम्म मर्मत सम्भारको अवधि राखिएको छ । सभागृहमा ५९३ जन अट्ने क्षमताको सभाहल छ । सभागृहको बेस ग्राउण्डमा २० वटा कार तथा ७० वटा मोटरसाइकल पार्किङ गर्न सकिने सचिव श्रेष्ठले बताए ।
भवनमा मुख्य सभाहल बाहेक १५० जना क्षमताको सेमिनार हल निर्माण भएको छ । सभाहल बाहिर फाउण्टेनसहितको भिआइपी पार्किङ स्थल समेत रहेको छ ।
