तनहुँको मानहुँकोट घुम्न आएका एक युवक मृत भेटिए
भञ्ज्याङ समाचारदाता, दमौली
तनहुँको व्यास नगरपालिका-५ स्थित मानहुँकोट घुम्न आएका एक युवक बुधबार मृत भेटिएका छन् । स्थानीयको घरमै सुतेको अवस्थामा शुक्लागण्डकी नगरपालिका-७ का ३५ वर्षीय सागर थापा मृत अवस्थामा भेटिएको जिल्ला प्रहरी कार्यालय तनहुँले जनाएको छ ।
मंगलबार राति १०/१२ जना साथीको समूहमा घुम्न आएका सागर बुधबार सुतेको अवस्थामा मृत फेला परेका जिल्ला प्रहरी नायव उपरीक्षक युवराज तिमिल्सिनाले बताए । उनले भने, ‘मंगलबार राति आएर मानहुँमै बास बसेका उनीहरु बुधबार बिहानै घुम्न पनि गएका रहेछन ।
साथीहरुसंग घुमफिर गरी स्थानीयको घरमा आराम गर्न सुतेका थापा मृत अवस्थामा भेटिए ।’ उक्त घटनामाथि थप अनुसन्धान भैरहेको जिल्ला प्रहरी कार्यालयले जनाएको छ ।
