भिमादमा दलित महिलाहरूका लागि नेतृत्व विकास पुनर्ताजगी तालिम
भिमाद : तनहुँको भिमाद नगरपालिकामा दलित महिलाहरूलाई लक्षित गर्दै नेतृत्व विकास सम्बन्धी ३ दिने पुनर्ताजगी तालिम सुरु गरिएको छ। भिमाद नगरपालिकाको आयोजनामा असार १ देखि ३ गते सम्म सञ्चालन हुने तालिमको उद्घाटन नगर प्रमुख दधिराज सुवेदीले गरेका हुन्।
उद्घाटन समारोहमा नगर प्रमुख सुवेदीले दलित समुदायले अब “दलित” भन्ने शब्दको प्रयोग हटाउँदै सशक्त रूपले समाजमा अगाडि बढ्नुपर्ने धारणा व्यक्त गरे। उनले सीमित व्यक्तिलाई लक्षित गरेर तालिम दिई तिनै व्यक्तिले त्यसको प्रभावकारी उपयोग गर्नु आवश्यक रहेको बताए। साथै, कृषि, आम्दानीमुखी र सिपमूलक तालिम तर्फ केन्द्रित हुनुपर्नेमा जोड दिए।
कार्यक्रममा उपप्रमुख शारदा खनालले विगतमा पनि यस्ता तालिमहरू सञ्चालन हुँदै आएको बताउँदै पुनर्ताजगी तालिमले महिलाहरूको नेतृत्व क्षमतामा महत्वपूर्ण योगदान पुर्याउने बताइन्। उनले महिलाहरूले शैक्षिक, राजनीतिक, आर्थिक र सामाजिक क्षेत्रमा सक्रिय भूमिका लिनुपर्नेमा जोड दिँदै आवश्यक बजेट आगामी आर्थिक वर्षमा विनियोजन गरिने प्रतिबद्धता व्यक्त गरिन्।
तालिममा कार्यपालिका सदस्य इन्दिरा खड्का, पूर्व कार्यपालिका सदस्य डिना गोतामे र सञ्चारकर्मी शालिकराम सुनार उपस्थित थिए। उक्त तालिममा भिमाद नगरपालिकाका ९ वटै वडाबाट ३० जना महिलाहरूको सहभागिता रहेको छ।
महिलाहरूलाई सशक्त बनाउने, क्षमता अभिवृद्धि गर्ने, व्यक्तित्व विकासका साथै वर्गीय अधिकारका विषयमा ज्ञान प्रदान गर्ने लगायतका विषय हरु बारे सिकाइएको छ। तालिममा पत्रकार अन्जान परियार सहजकर्ताको भूमिकामा रहेका छन्। सो कार्यक्रमको सञ्चालन सूचना अधिकारी टेकावती ढकालले गरेकी थिइन् भने कार्यपालिका सदस्य संगीता विश्वकर्माले स्वागत मन्तव्य राखेकी थिइन्।
