तनहुँको कोत्रेबाट लागूऔषध सहित ३ र भरुवा बन्दुकसहित किहुँबाट एक जना पक्राउ
- भञ्ज्याङ समाचारदाता (दमौली)
तनहुँ प्रहरीले लागूऔषध सहित ३ जना र भरुवा बन्दुकसहित एक जना युवकलाई पक्राउ गरेको छ । गण्डकी प्रदेश प्रहीरी कार्यालय पोखराका अनुसार इलाका प्रहरी कार्यालय बेलचौंतारा तनहुँको प्रहरी टोलिले २८६ एम्पुल सहित विभिन्न लागूऔषध सहित ३ जना युवालाई पक्राउ गरेको हो ।
शुक्लागण्डकी नगरपालिका-४ कोत्र स्थित गस्ति गर्ने क्रममा शंकास्पद रुपमा हिडिरहेका तनहुँको व्यास नगरपालिका-४ बस्ने २१ वर्षिय सन्तोष गुरुङ, शुक्लागण्डकी नगरपालिका-५ बस्ने ३० वर्षिय मनोज क्षेत्री र गोरखा जिल्लाको आरुपोखरीथोक घर भई तनहुँको शुक्लागण्डकी नगरपालिका-२ हलेदी बस्ने ३० वर्षिय रवि गुरुङलाई प्रहरीले पक्राउ गरेको बताइएको छ ।
पक्राउ परेकाको साथबाट प्रहरीले लागूऔषध डाइजापाम-१०४ एम्पुल, नुफिन-८९ एम्पुल र फेनरागन-९३ एम्पुल गरी जम्मा २८६ एम्पुल लागूऔषध फेला पारि बरामद गरेको छ । पक्राउ परेका सबैजना उपर लागूऔषध अन्तर्गत मुद्दा दर्ता गरी घटनाका विषयमा थप अनुसन्धान भईरहेको गण्डकी प्रदेश प्रहरी कार्यालय पोखराका प्रहरी नायव उपरिक्षक राजेन्द्रबाबु रेग्मीले जानकारी गराएका छन् ।
भरुवा बन्दुकसहित १ जना पक्राउ
यस्तै, इलाका प्रहरी कार्यालय बेलचौतारा तनहुँको प्रहरी टोलिले सोमबार भरुवा बन्दुक लिई हिडिरहेका एकजनालाई पक्राउ गरेको छ ।
तनहुँको भिमाद नगरपालिका-२ बन्दिछापमा एकजना मानिस भरुवा बन्दुक बोकी हिडिरहेको भन्ने विशेष सूचनाको अधारमा प्रहरी चौकी किँहूबाट खटिएको प्रहरी टोलिले ती व्यक्तिलाई पक्राउ गरेको बताइएको छ ।
पक्राउ पर्नेमा भिमाद नगरपालिका-२ बन्दिछाप सिमलबोट बस्ने ६० वर्षिय टुक बहादुर थापा रहेका छन् । पक्राउ परेका उनको साथबाट प्रहरीले १ नाले भरुवा बन्दुक फेला पारेको छ । निज उपर हातहतियार मुद्दा शिर्षकमा मुद्दा दर्ता गरी घटनाका विषयमा थप अनुसन्धान भईरहेको प्रहरी नायव उपरिक्षक रेग्मीले जानकारी गराएका छन् ।
