जबरजस्ती करणी मुद्दाका प्रतिवादी बुधे ४८ बर्ष पछी पक्राउ
- भञ्ज्याङ समाचारदाता (दमौली)
जबरजस्ती करणी मुद्दाका फरार प्रतिवादीलाई तनहुँ प्रहरीले ४८ वर्षपछि पक्राउ गरेको छ । विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका व्यक्तिहरुको खोजी गर्ने अभियानका क्रममा प्रहरीले ती व्यक्तिलाई पक्राउ गरेको हो ।
जबरजस्ती करणी मुद्दामा मिति २०२९ पुस २३ गते तनहुँ जिल्ला अदालतको फैसलाले ६ वर्षकैद सजाए भई फरार रहेका तनहुँको साविक ढोरफिर्दी-१ का प्रतिवादी केशे दमै भन्ने बुधे दमैलाई उनकै घर वतनबाट पक्राउ गरिएको सूचना अधिकारी प्रहरी निरीक्षक शिवराज क्षेत्रीले जानकारी गराएका छन् ।
पक्राउ परेका बुधेलाई तनहुँ जिल्ला अदालत बुझाईएकोमा थुनामा पठाइएको छ । त्यस्तै, सवारि ज्यान मुद्दामा जरिवाना रहेका २ जना, चोरी मुद्दाका ४ जना, लिखत बेइज्जती मुद्दामा १ जना, जालसाची मुद्दामा २ जना गरी १० जनालाई पनि प्रहरीले आइतबार पक्राउ गरी जरिवानाका लागि जिल्ला अदालतमा उपस्थिति गराइएको तनहुँ प्रहरीले जनाएको छ ।
