बुल्दी खोला पुल प्रकरण : पौडेलद्वारा पुल उद्घाटन गर्ने तयारी, झड्प हुने स्थिति नदेखिए प्रशासनले नरोक्ने
भञ्ज्याङ समाचारदाता (दमौली)
तनहुँको व्यास नगरपालिका-१, १० र ११ जोड्ने तालघारे स्थित बुल्दी खोला पुल उद्घाटनका विषयलाई लिएर विवाद हुँदा हिजो दिन भर तनहुँको दमौली तनावग्रस्त बन्यो ।
पुल उद्घाटनको विषयलाई लिएर नेपाल कम्यूनिष्ट पार्टी (नेकपा) निकट राष्ट्रिय युवा संघ नेपाल तनहुँ विरोधमा उत्रियो । पुल उद्घाटन कार्यक्रम विवादित बनेपछि स्थानीय प्रशासनले कार्यक्रम स्थगित गर्न आग्रह गर्दै सम्भावित झड्पलाई ख्याल गर्दै हिजो दिउँसा १२ देखि साँझ ६ बजेसम्म निषेधाज्ञा जारी गरेको थियो ।
निषेधाज्ञाको अवाज्ञा गर्दै उक्त पुल उद्घाटनका लागि नेपाली कांग्रेसका वरिष्ठ नेता रामचन्द्र पौडेल दलबलका साथ कार्यक्रम स्थल तर्फगएका थिए । उनलाई निषेधाज्ञा तोडेको भन्दै स्थानीय प्रहरी प्रशासनले सुरक्षित रुपमा नियन्त्रणमा लियो र साँझ ६ बजेतिर रिहा गरिदिएको थियो ।
यसैको विरोमा आज नेपाली कांग्रेसले दमौलीमा विरोध प्रदर्शन गर्दैछ । बुल्दी पुल उद्घाटन गर्न जाने क्रममा वरिष्ठ नेता रामचन्द्र पौडेलको पक्राउ तथा नेता कार्यकर्तामाथिको पक्राउ र कुटपिट प्रकरणको विरोधस्वरुप कांग्रेस तनहुँले विरोध गर्न लागेको हो ।
कार्यक्रममा वरिष्ठ नेता पौडेलसहित जिल्लाका तीन जना केन्द्रीय सदस्यको सहभागिता रहने बताइएको छ । केन्द्रीय सदस्यहरु शंकर भण्डारी, गोविन्द भट्टर्राई तथा प्रदीप पौडेल तीनै जना कार्यक्रममा सहभागी हुने स्रोतले जनाएको छ।
यसैगरी आमन्त्रित केन्द्रीय सदस्य ध्रुव वाग्लेसहित अरु नेताहरु पनि कार्यक्रममा सहभागी हुने बताइएको छ । दमौलीबाट विरोध र्यालीपछि बुधबार तय भएको व्यास १, १० र ११ जोड्ने बुल्दी पुल उद्घाटनमा सहभागी हुने तयारी गरिएको स्रोतले जनाएको छ ।
यता, यो कार्यक्रमका विषयमा केही जानकारी नआएको र त्यस्तो रोकतोकको कुनै निर्देशन नभएको प्रमुख जिल्ला अधिकारी सागर आचार्यले बताएका छन् । ‘हिजो कार्यक्रम रोक्न भौतिक पूर्वाधार मन्त्रालयको पत्र आएको थियो,’ उनले भने’, आज हामीलाई कुनै त्यस्तो जानकारी छैन ।’
‘कार्यक्रम हुँदै छ भन्ने हल्ला त सुनिएको छ, आधिकारीक जानकारी आएको छैन्’, प्रजिअ आचार्यले भने, ‘हाम्रो तर्फाट सुरक्षा व्यवस्था हुन्छ । यदि झडपको अवस्था आएमा नियन्त्रणको प्रयास हुने छ र त्यस्तो नभए केही हुँदैन ।’
