विद्यार्थी र शिक्षकहरुलाई बार्षिक पुरस्कार वितरण
- भञ्ज्याङ समाचारदाता (भानु)
तनहुँको भानु नगरपालिका-१ साजवोटे स्थित फिस्टेल आवासिय माध्यमिक विद्यालयले सरस्वती पुजा, कक्षा ११ का विद्यार्थीहरुलाई स्वागत तथा बार्षिक पुरस्कार वितरण कार्यक्रम सम्पन्न गरेको छ । श्रीपञ्चमीका अवसरमा विद्यालयले आयोजना गरेको उक्त कार्यक्रममा विद्यालय व्यवस्थापन समितिका अध्यक्ष घनश्याम देवान श्रेष्ठले फिस्टेलले यसक्षेत्रमा लामो समयदेखि शिक्षाको ज्योति फैलाउने कामसंगै समाजसेवा पनि गरिरहेको बताए ।
विद्यालयले यसै शैक्षिकसत्रबाट प्लस टुको कक्षा पनि संचालन भईरहेकोले विद्यालयलाई राम्रो बनाउने काम शिक्षक, कर्मचारी, बिद्यार्थी र अभिभावक पनि लाग्नुपर्ने अध्यक्ष देवानले बताए । कार्यक्रममा विद्यालय व्यवस्थापन समितिका सदस्य परशुराम अधिकारीले विद्यालयले अझै समाजलाई योगदान पुर्याउने विश्वास ब्यक्त गरेका छन् ।
उक्त अवसरमा विद्यालयका परिक्षाहरुमा उत्कृष्ट हुन सफल विद्यार्थीहरु, अन्तर बिद्यालय खेलकुद, क्विज, दौड, भलिवल लगायतका विभिन्न प्रतियोगिताका साथै भानु नगरपालिका स्तरीय क्विज प्रतियोगितामा द्धितीय हुन सफल विद्यार्थी र विद्यालयमा उत्कृष्ट सेवा प्रदान गर्ने शिक्षकहरुलाई विभिन्न पुरस्कार तथा प्रमाणपत्रद्वारा पुरस्कृत गरिएको छ ।
