शुक्लागण्डकी मेयर कप २०७७ को फाइनल प्रतिस्पर्धा आज

शुक्लागण्डकी नगरपालिकाले संचालन गरेको मेयर कप २०७७ पुरुष भलिबल प्रतियोगितामा आयोजक शुक्लागण्डकी ‘ए’ फाइनलमा प्रवेश गरेको छ । शनिबार भएको पहिलो सेमिफाइनल खेलमा घिरिङ गाउँपालिकालाई ३-२ सेटले हराउदै शुक्लागण्डकी ‘ए’ फाइनल प्रवेश गरेको हो ।

गाउँफर्कोदय माविको खेलमैदान गणपतेमा भएको निकै रोमाञ्चक खेलमा शुक्लागण्डकीले दुइ सेट लगातार २५-१४, २५-२३ ले आफ्नो पोल्टामा पार्‍यो । तेस्रो र चौथो सेट २५-२२ र २५-१६ मा घिरिङले जित निकाल्यो । घरेलु दर्शकले खचाखच भएको मैदानमा शुक्लागण्डकी ए ले पाँचौ सेटमा उत्कृष्ट प्रदर्शन गर्दै १५-९ ले जित निकाल्दै फाइनलमा प्रवेश गरेको हो ।

फाइनलमा शुक्लागण्डकी ‘ए’ बाग्लुङको गल्कोट नगरपालिका र कास्कीको मादी गाउँपालिकाबिचको विजेतासंग खेल्ने छ । आईतबार विहान दोस्रो सेमिफाइनल हुने आयोजकले जनाएको छ । शनिबार पहिलो सेमिफाइन सहित ६ खेल भए । पहिलो चरणको एक खेल र क्वाटरफाईनल अन्तर्गतका चार खेल भए ।

शनिबारको पहिलो खेल पहिलो चरण अन्तर्गत तनहुँको भिमाद नगरपालिका र ऋषिङ गाउँपालिकाबिच भएको थियो । जसमा भिमाद नगरपालिका २-० को सोझो सेटमा विजयी भएको छ । पहिलो सेटमा २५-१८ ले विजयी भएको भिमाद दोस्रो सेटमा २५-२२ स्कोर प्राप्त गर्दै क्वाटरफाईनल प्रवेश गर्न सफल भएको थियो ।

क्वाटरफाईनलको पहिलो खेलमा पुतलीबजार नगरपालिका स्याङजालाई २-१ को सेटमा पराजित गर्दै कास्कीको मादी गाउँपालिकाले सेमिफाईनलको यात्रा तय गरेको थियो । मादीले पुतलीबजारलाई २३-२५, २५-१९ र २५-२१ को स्कोरका साथ विजयी हासिल गरेको छ ।

दोस्रोे क्वाटरफाईनल खेलमा आयोजक शुक्लागण्डकी नगरपालिका ‘ए’ ले बौदीकाली गाउँपालिका नवलपुरलाई २५-१६, २५-२३ को स्कोरको साथ सोझो सेटमा पराजित गर्न सफल भयो ।

तेस्रो क्वाटरफाईनलमा हरीनास गाउँपालिका स्याङजालाई २-१ को सेटमा पराजित गर्दै घिरिङ गाउँपालिका तनहुँ सेमिफाईनलमा प्रवेश गरेको छ । घिरिङले २३-२५, २५-१४, २५-२३ को स्कोर प्राप्त गर्दै विजयी भएको थियो ।

अन्तिम क्वाटरफाईनल खेलमा बाग्लुङको गलकोट नगरपालिका विजयी भएको छ । गलकोटले भिमादलाई २-० को सोझो सेटमा पराजित गरेको हो । पहिलो सेटमा २५-१५ र दोस्रो सेटमा २५-१४ को नजिता गलकोटले आफ्नो पक्षमा गर्‍यो । गलकोटका खेलाडी सामु भिमादका खेलाडी कमजोर सावित भए ।

प्रतियोगिताको विजेताले नगद एक लाख ५० हजार रुपैयाँको साथमा शिल्ड, मेडल र प्रमाणपत्र प्राप्त गर्ने मेयर कप सञ्चालन तथा व्यवस्थापन समिति संयोजक एवं शुक्लागण्डकी-५ का वडाध्यक्ष दीर्घबहादुर थापाले जानकारी दिए । उनका अनुसार दोस्रोले एक लाख, तेस्रोले ५० हजार रुपैयाँ र सान्त्वनाले २५ हजार रुपैयाँको साथमा शिल्ड, मेडल र प्रमाणपत्र पाउनेछन् ।

सेयर गर्नुहोस्

प्रतिक्रिया दिनुहोस्

सम्बन्धित खवर