पहिरोले अवरुद्ध तनहुँका मुख्य सडक आंशिक खुल, ग्रामीण सडकको पहिरो हटाउन थालियो

अविरल झरीसंगै आएको बाढीपहिरोका कारण तनहुँका लगभग सबै सडक सञ्जाल अवरुद्ध हुन पुगेका थिए । जिल्ला भित्रका मुख्य सडक मात्र होइन् अधिकांश भित्री तथा ग्रामीण सडक पनि बाढीपहिरोका कारण क्षतविक्षत अवस्थामा भएकाले अवरुद्ध छन् । तनहुँको करिब ७२ किलोमिटर सडक खण्ड पृथ्वीराजमार्ग पर्छ । यो राजमार्गमा पनि दर्जनौ साना ठूला पहिरो जाँदा अवरुद्ध हुन पुगेका थिए । अहिले राजमार्गको पहिरो हटाएर सञ्चालनमा ल्याइएको छ । तर, अझै भित्री तथा ग्रामीण सडकहरु सञ्चालनमा आउने सकेका छैनन्।

पहिराले अवरुद्ध भएका ग्रामीण सडक पुनःसञ्चालन गराउन प्रयास भइरहेको हायक प्रमुख जिल्ला अधिकारी चित्राङ्गत बराल बताए । ‘बाढीपहिराले कतिपय ठाउँमा सडक भासिएको छ’, उनले भने, ‘पहिरो हटाउने तथा भासिएको सडक मर्मत सुधार गर्न समस्या आएको छ । कतिपय ठाउँमा भने पैदलयात्री समेत हिँड्न नमिल्ने गरी पहिरो खसेको हुँदा सडक मर्मत सुधारका कामलाई अगाडि बढाइएको छ।’

यस्तै, डुम्रे-बन्दिपुर सडक खण्डको पहिरो हटाएर शनिबार साँझबाट सञ्चालनमा ल्याइएको छ । बन्दिपुर गाउँपालिकाका ग्रामीण सडक अवरुद्ध छन् । मुख्य सडक डुम्रे-बन्दीपुरको आंशिक खण्ड सञ्चालनमा आए पनि ग्रामीण सडक खुलाउन केही समय लाग्ने उपाध्यक्ष करुणा गुरुङले बताइन् । उनले भनिन्, ‘डुम्रे-बन्दीपुर, बन्दीपुर-ढाँडखोला, बन्दीपुर-धरमपानी लगायतका सडक खण्डामा बाढीपहिरोले ठूलो क्षति पुर्‍याएको छ ।’

भानु नगरपालिकाको वडा नं. १३ जोड्ने दमौली-पोखरीछाप सडक खण्डको वृतादेखि पोखरीछापसम्मको सडकमा खसेको पहिरो सोमबार दिउँसो हटाएर सञ्चालनमा ल्याइएपनि चन्द्रावती-पोखरीछाप सडक खण्ड मंगलबारसम्म खुलाउने गरी काम भएको भानु-१३ का वडाध्यक्ष रामबहादुर बानीयाले बताए ।

शुक्लागण्डकी नगरपालिकाले ग्रामीण भेगका अवरुद्ध सडक खुलाउन शुरु गरेको छ । तनहुँ र स्याङ्जा जोड्ने ढोरबाराही मोटरमार्गको पहिरो हटाएर सडक सञ्चालन गरिएको प्रमुख प्रशासकीय अधिकृत गंगालाल सुवेदीले जानकारी दिए । उनले भने, ‘मान्द्रेदेखि छाब्दीखण्डमा पहिराको जोखिम कायमै छ, त्यहाँ सडकको ट्रयाक नै नरहने गरी क्षति पुगेको छ ।’

शुक्लागण्डकी अन्तर्गत दुलेगौंडा-हर्कपुर, लालध्वज, दुलेगौँडा फिरफिरे, ढोरबाराही लगायतका मुख्य मार्गमा पहिराले क्षति पुगेको छ । ग्रामीण भेगका सडक खुलाउन समस्या परेको सुवेदीले बताए ।

घिरिङ गाउँपालिकाका ग्रामीण सडक पनि पहिराले अवरुद्ध छन् । पहिरो हटाएर मुख्य मुख्य सडक सञ्चालन गर्न शुरु गरिएको गाउँपालिकाका अध्यक्ष रनबहादुर रानाले जानकारी गराए । ‘वर्षा रोकिएको छैन, अहिले हटायो फेरि पहिरो खस्छ’, उनले भने, ‘तत्काल आवश्यक सडकको मात्र पहिरो हटाउन शुरु गरेका छौ ।’

जिल्लाका दश वटै पालिका बाढीपहिरोबाट प्रभावित छन् । सबै पालिकामा ग्रामीण सडक अवरुद्ध हुँदा सर्वसाधरण मारमा परेका छन् । बाढीले व्यास नगरपालिका-१ र १३ जोड्ने छाब्दी खोलास्थित पुल भत्किएपछि दक्षिणी भेगसम्मको पहुँच टुटेको छ । बुद्धसिं मार्ग अन्तर्गत निर्मित पुल भत्किएपछि किसानले उत्पादन गरेका कृषि उपज दमौली ल्याएर बिक्री गर्न सास्ती भएको छ ।

ग्रामीण भेगमा दैनिक उपभोग्य वस्तु ढुवानी हुन सकेको छैन । यही पुल हुँदै व्यास-१३ को बेलवास, पोखरीभञ्ज्याङ, व्यास-१४ को केशवटार, सुढे, ऋषिङको हुस्लाङ, गुम्लेक, देवघाट, आँबुखैरेनी, बन्दीपुर लगायतका ग्रामीण भेगका बासिन्दा आवतजावत गर्दथे । अविरल झरीसंगै आएको बाढीपहिरोले जिल्लाका अधिकांश ग्रामीण सडकमा ठूलो क्षति पुगेको छ । पहिरोका कारण अवरुद्ध सडक सुचारु गराउन अहिले जिल्लाका सबै स्थानीय पालिकाहरु लागि परेका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर