`बीस बर्ष पारि बिवाह´ गर्ने युवतीलाई व्यासले प्रोत्साहन रकम दिने
भञ्ज्याङ न्यूज
‘बिवाहबरी बीस बर्ष पारि’ भन्ने अभियानलाई व्यास नगरपालिका कार्यालयले व्यवहारमा लागु गर्ने भएको छ । उमेर नपुग्दै बिवाह गर्ने पराम्परालाई निरुत्साहित गर्दै उमेर पुगेपछि गरिने बिवाहलाई प्रोत्साहन गर्न नगरपालिकाले यस्ता कार्यक्रम ल्याएको हो ।
उमेर पुगेपछि बिवाह गर्ने युवतीलाई व्यास नगरपालिकाले रु. दश हजार भत्ता प्रदान गर्ने योजना रहेको नगरप्रमुख बैकुण्ठ न्यौपानेले जानकारी दिनुभयो । बिवाह गर्न लागेको निमन्त्रणा नगरपालिकालाई आए बिवाहमा सहभागि भएर गर्दुवा स्वरुप उक्त रकम दिइने उहाँले बताउनुभयो ।
त्यसैगरी नगरपालिकाले स्नातक उत्तीर्ण गरी बेरोजगार बसेका महिलालाई अनुदान दिने मापदण्ड समेत पारित गरेको छ । शुरुमा केही गरौं भनेर रु.पन्ध्र लाख बजेट बिनियोजन गरिएको नगरपालिकाले जनाएको छ ।
बिदेशबाट फकिएका युवाहरुलाई उद्यमशीलता तर्फ आर्कर्षित गर्न रु.पचास लाख बजेट बिनियोजन गरिएको छ । संघीय बजेट र नगरपालिकाको आन्तरिक बजेट गरी करिब रु.तीन करोडको हाराहारीमा बजेट बिनियोजन गरिएको नगरप्रमुख न्यौपानेले बताउनुभयो ।
संग्रहालय व्यवस्थापन गर्ने, जनजातीय पहिचान अघि बढाउने, साँस्कृतिक पक्षलाई महत्व दिने, दलित जातिहरुको जातिय पराम्परागत पेशा, व्यवसायलाई संरक्षण र प्रोत्सान लगायतका कार्यलाई महत्व दिइने नगरपालिकाले जनाएको छ ।
फोहोरमैलाबाट उर्जा उत्पादन गर्न विभिन्न अनौपचारिक प्रस्तावहरु आइरहेको हुदाँ इच्छुक कम्पनी वा संस्थाहरुसंग लागत साझेदारीका आधारमा नियमानुसार प्रस्ताव माग गरेको छ । नगरपालिका अन्तरगत कार्यरत बालबिकास शिक्षक, माध्यमिक विद्यालयका लेखापाल र विद्यालयका कार्यालय सहयोगीहरुलाई पारिश्रमिक तय गरेको छ ।
उनीहरुलाई क्रमश : पन्ध्र हजार एक सय र रु.चौध हजार पाँच सयका दरले श्रावण महिनादेखि पारिश्रमिक उपलब्ध गराउदै आएको नगरपालिकाका सुचना प्रविधि अधिकृत बिशाल पण्डितले जानकारी दिनुभयो ।
