तनहुँ अदालतमा पल शाहविरुद्धको मुद्दा दर्ता, थुनछेकको वयान आजैबाट हुने
भञ्ज्याङ न्यूज
तनहुँ जिल्ला अदालतमा अभिनेता पल शाहविरुद्धको मुद्दा दर्ता भएको छ । तनहुँ जिल्ला सरकारी वकिल कार्यालयले अदालतमा अभियोगपत्र दर्ता गराएको हो ।
एक नाबालिग गायिकाले बलात्कार गरेको भन्दै उजुरी गरेपछि चर्चित अभिनेता समेत रहेका शाह अहिले तनहुँ प्रहरीको हिरासतमा छन् ।
जिल्ला प्रहरी कार्यालय तनहुँले अनुसन्धान सकेर राय सहितको प्रतिवेदन सोमबार सरकारी वकिलको कार्यालयलाई बुझाएको थियो । जिल्ला न्यायाधीवक्ता रामचन्द्र शर्माले शाह विरुद्ध कैद सजाय माग सहित मुद्दा दर्ता गरिएको जानकारी दिए । उनका अनुसार शाह विरुद्ध १० देखि १२ वर्षसम्म कैद सजाय माग गरिएको छ ।
पीडित १६ वर्ष कम भएका कारण शाह विरुद्ध १० देखि १२ वर्षसम्म कैद तथा मनासिव क्षतिपूर्तिको मागदावी सहित मुद्दा दर्ता गरिएको जिल्ला न्यायाधीवक्ता शर्माले जानकारी गराए ।
यस्तै, शाहका म्यानेजर भनिएका कृष्ण जोशीविरुद्ध सो सजायको आधा सजाय माग गरिएको छ । जोशीलाई मतियारका रुपमा शाहको भन्दा आधा सजाय मागदावी गरिएको शर्माले बताएका छन् ।
तनहुँमा गत फागुन ११ गते नाबालिगकले शाह विरुद्ध जबरजस्ती करणीको जाहेरी दर्ता गरेकी थिइन् । त्यसपछि शाहले फागुन १५ गते प्रहरीमा आत्मसमर्पण गरेका थिए । सोही दिन प्रहरीले शाह विरुद्ध सात, २१ गते १२ र चैत ४ गते पाँच दिनको म्याद थप गरेको थियो ।
अभिनेता शाह विरुद्धको अभियोग अदालतमा दर्ता भइसकेको र आजबाटै थुनछेकको बयान समेत सुरु हुने शाहका वकिल भानु सुवेदीले बताए ।
तनहुँमा अभिनेता शाहको तर्फबाट नेपाल वार एशोसिएशन तनहुँका अध्यक्ष समेत रहेका अधिवक्ता भानु सुवेदी र वरिष्ठ अधिवक्ता कमलामोहन वाग्लेले बहस गर्ने भएका छन् ।
यस्तै, शाहविरुद्ध पूर्वीनवलपरासी जिल्ला अदालतमा बलात्कारको अभियोग पत्र दर्ता भइसकेको छ । पीडित भनिएकी नाबालिगले दुइ ठाउँमा शाहविरुद्ध जाहेरी दिएकी थिइन् ।
तनहुँ जिल्ला अदालतमा थुनछेकको बहसपछि मात्र शाहको पूर्वीनवलपरासीको मुद्दाको प्रकृया अगाडि बढाउने तयारी भइरहेको छ ।
तनहुँ अदालतमा अभियोग पत्र दर्ता भएपछि आरोपी शाहको यहाँ बयान हुने छ । त्यसपछि थुनछेकको बहसपछि न्यायाधीशले पुर्पक्षका लागि थुनामा पठाउने तथा धरौटी वा साधारण तारेखमा छाड्नेमध्ये एक आदेश गर्नेछन् ।
तनहुँ अदालतले शाहलाई पुर्पक्षका लागि थुनामा पठाए पूर्वी नवलपरासी अदालतमा उनको बयान मात्र हुने र फैसलाको प्रकृया अगाडि बढ्न सक्ने बताइएको छ । पूर्वीनवलपरासी जिल्ला सरकारी वकिल कार्यालयले शाहविरुद्ध १२ देखि १४ वर्षसम्म कैद सजाय माग गर्दै अभियोग दर्ता गरेको छ ।
