२६औं केन्द्रीय कार्यसमितिका लागि बारको मतदान सुरु, तनहुँ केन्द्रबाट ६५ जनाद्वारा मतदान गर्दै
भञ्ज्याङ न्यूज
नेपाल बार एसोसिएसनको २६औं केन्द्रीय कार्यसमितिको नयाँ नेतृत्व चयनको लागि आज बिहान आठ बजेदेखि मतदान शुरु भएको छ । नेपाल बार एसोसिएसन, २०७८ को प्रमुख निर्वाचन अधिकृत वरिष्ठ अधिवक्ता उषामल्ल पाठकका अनुसार उपत्यकाको काठमाडौं केन्द्रसहित देशभर ३५ स्थानबाट एकसाथ मतदान प्रारम्भ भएको छ । मतदान अपराहृन ४ बजे सम्पन्न हुनेछ ।
बारमा अध्यक्षसहित ११ पदाधिकारी र सदस्य गरी २५ जनाको कार्यसमितिका लागि निर्वाचन हुनेछ । निर्वाचनमा नौ हजार ७०८ अधिवक्ता मतदाता रहेका छन् । त्यसमध्ये उपत्यकामा पाँच हजार ७०० र उपत्यका बाहिर तीन हजार ५०० रहेका छन् ।
नयाँ कार्यसमितिका लागि प्रगतिशील तथा पेशागत कानून व्यवसायी समूह र बृहत् लोकतान्त्रिक प्रगतिशील समावेशी तथा पेशागत कानून व्यवसायी समूहबीच प्रतिस्पर्धा हुने भएको छ । उक्त समूहमध्ये प्रगतिशील तथा पेशागत कानून व्यवसायी समूहको नेतृत्व वरिष्ठ अधिवक्ता विष्णुमणि अधिकारी र बृहत् लोकतान्त्रिक प्रगतिशील समावेशी तथा पेशागत कानून व्यवसायी समूहको नेतृत्व गोपालकृष्ण घिमिरेले गरेका छन् । बारमा अध्यक्षका लागि व्यक्तिगतरुपमा र समूहगतरुपमा गरी आठ जनाको उम्मेदवारी परेको छ ।
यस्तै, तनहुँ जिल्ला अदालत परिसरमा एक बुथको व्यवस्था गरिएको छ । यो बुथबाट तनहुँ, लमजुङ र गोरखा जिल्लाका अधिवक्ताहरुले मतदान गर्ने निर्वाचन अधिकृत एवं नेपाल बार एसोसिएसन तनहुँका अध्यक्ष भानु सुवेदीले बताए ।
उनका अनुसार तनहुँको मतदान केन्द्रबाट तनहुँका ४७, लमजुङका १० र गोरखाका ८ जना गरी ६५ जना अधिवक्ताहरु मतदानमा सहभागि हुँदै छन् ।
