आठौं तनहुँ महोत्सव : प्रकाश सपुतले दर्शक नचाए, आज छेवाङ्ग लामाको प्रस्तुती रहने

आठौ तनहुँ महोत्सव दमौलीमा जारी छ । महोत्सवको आठौं दिन चर्चित कलाकार प्रकाश सपुतले आफ्ना सांगितिक प्रस्तुती गरी दर्शकलाई भरपूर मनोरञ्जन प्रदान गरेका छन् । पछिल्लो समय पीर गीतले ख्याती कमाएका कलाकार सपुतको प्रस्तुती हेर्न दर्शकहरुको बाक्लो उपस्थिति रहेको थियो ।

कलाकार सपुतले महोत्वसमा सांगितक प्रस्तुती दिंदा महोत्सवमा आएका युवायुवती, वृद्धवृद्धा छमछमी नाचेर मनोरञ्जन लिइएको कलाकार समन्वय समितिका संयोजक कुमार मल्लले बताए । त्यस्तै, विहीबार कलाकार अस्मिता अधिकारी तथा स्थानीय कलाकारहरुले पनि आ-आफ्ना सांगितक प्रस्तुती दिएका थिए ।

महोत्सवमा राष्ट्रिय ख्याति प्राप्त कलाकारको प्रस्तुति रहेका कारण बिहीबार दर्शकहरुको उल्लेख्य सहभागिता रहेको आयोजकले जनाएको छ । महोत्सवमा बिहीबार साँझ सबिन र्राई र द पारोहको लाइभ कन्सर्ट प्रस्तुत गरिएको थियो । महोत्सवको नवौं दिन शुक्रबार गायक छेवाङ्ग लामाको सांगितक प्रस्तुती रहने आयोजकले जनाएको छ ।

मादीसेती नदीमा मोटरबोट परीक्षण सफल

आठौँ तनहुँ महोत्सवको समयमा मादीसेती नदीमा सञ्चालनमा ल्याइएको मोटरबोट परीक्षण गर्दा सफल भएको छ । पानीको बहाव परीक्षण गर्दा आगामी दिनमा मोटरबोट सञ्चालन गर्न मिल्ने भएको हो । मोटरबोट व्यवस्थापन समितिका संयोजक दीपक र्राईले सेतीमादी दोभानदेखि बुल्दीको दोभानसम्म मोटरबोटको परीक्षण गर्दा सफल भएको बताए । डोजर लगाएर उक्त भागको नदीमा रहेका ढुङ्गाहरू हटाइएपछि मोटरबोट सञ्चालन गर्न सकिएको हो ।

मादी र सेती नदीमा पहिलो पटक मोटरबोट चढन पाउँदा तनहुँवासीहरू हौसिएका छन् । मोटरबोटको सफल आरोहण भएसँगै उक्त नदीमा निरन्तर रूपमा सञ्चालनमा ल्याइने तयारी गरिएको छ । आठौँ तनहुँ महोत्सवमा मोटरबोटको आकर्षण बढेको महोत्सवका संयोजक पवीन्द्रकुमार श्रेष्ठले बताए ।

व्यास नगरपालिकासँग समन्वय गरी मोटरबोट सञ्चालनमा ल्याउने तयारी भइरहेको नारायणगढबाट मोटरबोट ल्याएका लेखनाथ पौडेलले बताए । उनले भने, ‘नारायणी नदीमा जस्तै गरी मादी र सेतीमा पनि मोटरबोट सञ्चालन गर्ने तयारीमा हामी छौं । छिट्टै सम्बन्धित निकायहरूबाट स्वीकृत लिएर मोटरबोट सञ्चालन गराइने योजना रहेको छ ।’

महोत्सवका बेला मोटरबोट चढ्नका लागि प्रतिव्यक्ति रु २५० लिइँदै आएकामा घटाएर १५० पुर्‍याइएको छ । दर्शकको मागलाई ध्यानमा राखी मोटरबोटको शुल्क घटाइएको तनहुँ उद्योग वाणिय संघका महासचिव सुबोध अधिकारीले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर