क्षेत्रप्रताप स्मृति साहित्य पुरस्कार कोइरालालाई
भञ्ज्याङ समाचारदाता/दमौली
क्षेत्रप्रताप स्मृति साहित्य पुरस्कार २०७८ बाट वरिष्ठ गायिका हरिदेवी कोइरालालाई प्रदान गरिएको छ । गीतल प्रतिष्ठान नेपाल तथा नाटक मञ्च तनहुँले स्थापना गरेको उक्त साहित्यिक पुरस्कार शनिबार एक कार्यक्रमको आयोजना गरी प्रदान गरिएको हो ।
तनहुँको व्यास नगरपालिका-१ स्थित आदिकवि भानुभक्त क्याम्पसमा आयोजित एक कार्यक्रममा कला संस्कृतिको क्षेत्रमा उल्लेखनीय योगदान पुर्याए बापत कोइरालालाई उक्त पुरस्कार प्रदान गरिएको मञ्चका अध्यक्ष आकाश अधिकारीले बताए । उक्त पुरस्कारको राशी नगद २५ हजार रुपैयाँ रहेको छ ।
यसैगरी गीतल राष्ट्रिय पुरस्कार २०७७ कवि प्रोल्लास सिन्धुलिया र २०७८ गायक राज सिग्देललाई प्रदान गरिएको छ । उक्त पुरस्कारको राशी सात हजार रुपैयाँ रहेको छ । यस्तै गीतल प्रतिभा पुरस्कार २०७७ लोकगायक शंकर परियार र २०७८ लोकगायिका आशा विसीलाई प्रदान गरिएको छ । उक्त पुरस्कारको राशी पाँच हजार रुपैयाँ रहेको प्रतिष्ठानले जनाएको छ ।
पुरस्कृत स्रष्टाहरुलाई प्राज्ञ सरुभक्त श्रेष्ठले पुरस्कार वितरण गरेका थिए । कार्यक्रममा आदिकवि भानुभक्त क्याम्पसका सहप्राध्यापक नारायण प्रसाद गौतमद्वारा लिखित महाकाव्य सुनकेशरी विमोचन गरिएको थियो ।
समालोचक महाप्रसाद हड्खले (महेश)ले यस महाकाव्यले नेपाली साहित्यको क्षेत्रमा नयाँ आयाम थपेको बताए । मञ्चले भाषा, साहित्य र कला संस्कृतिको क्षेत्रमा स्थानीय तथा राष्ट्रिय स्तरमा महत्वपूर्ण भूमिका खेल्दै आएको सचिव दिवाकर भट्टराइले बताए ।
