निर्वाचनका सामाग्रि सहित कर्मचारीलाई मतदानस्थल पठाइयो

स्थानीय तह निर्वाचनका तनहुँका मतदानस्थलमा मतदान अधिकृत र कर्मचारी सामग्रीसहित पठाएको छ । सुरक्षाकर्मीका साथमा कर्मचारी, मतपेटिका, मतपत्र, स्वस्तिक चिहृन, मतदाता नामावलीलगायत आवश्यक सामग्री पठाइएको छ ।

मुख्य निर्वाचन कार्यालयमार्फत निर्वाचन अधिकृतले मतदानमा आवश्यक पर्ने स्वस्तिक छाप, नङमा लगाउने मसी, स्टायाम्प प्याड, छेकवबा, पोलबुक, लाह छाप, सुरक्षण सिल, मत पेटिका स्टिकर, मैनबत्ती मतदाता परिचयपत्र पठाइएको मुख्य निर्वाचन अधिकृतको कार्यालयले जनाएको छ । अन्य सामग्रीमा कैची, रबर म्याट, स्टाप्लर, ग्लुस्टिक, पन्चिङ मेसिन, सेनिटाइजर, प्राथमिक उपचार बाकस, निर्वाचन निर्देशिका अनुसूची, स्टेसनरीका सामान पठाइएको छ ।

वैशाख ३० गते हुने स्थानीय तह निर्वाचनका लागि जिल्ला निर्वाचन कार्यालय तनहुँले सोमबार र मंगलबार निर्वाचन सामग्री सहिज मतदान अधिकृत, कर्मचारी, सुरक्षाकर्मीहरु पठाइएको हो । कार्यालयले दश वटा पालिकाका २९७ मतदान केन्द्रमा खटिने मतदान अधिकृतलाई निर्वाचनका लागि आवश्यक पर्ने सामग्री उपलब्ध गराउको छ । मुख्य निर्वाचन अधिकृतको कार्यालयबाट नियुक्ति पत्र बुझेर आएका कर्मचारीलाई सामग्री वितरण थालिएको कार्यालय प्रमुख हरिप्रसाद ढकालले बताए ।

नियुक्ति पत्रलाई अनलाइन सफ्टवेयरमा प्रविष्ट गरेपछि आवश्यक सामग्री प्रदान गरिएको छ । ‘निर्वाचनका लागि कार्यालयबाट ६१ प्रकारका सामग्री वितरण गरिएको छ’, उनले भने, ‘मतपेटिका, परिचयपत्र, लाहाछाप, स्ट्याम्प लगायतका सामग्री निर्वाचन कार्यालयबाट र मतपत्र भने मुख्य निर्वाचन अधिकृतको कार्यालयबाट उपलब्ध गराइएको छ ।’

तनहुँका चार नगरपालिका, छ गाउँपालिकाका ८५ वटा वडाका ४४५ पदमा विभिन्न राजनीतिक दल, स्वतन्त्र गरी १ हजार ६३७ जना उम्मेदवार चुनावी मैदानमा उत्रिएका छन् । जिल्लामा १ लाख १७ हजार १३४ पुरुष र १ लाख २७ हजार २०६ महिला गरी २ लाख ४४ हजार ३४० जना मतदाता रहेको प्रमुख ढकालले बताए । तनहुँमा गत स्थानीय तह निर्वाचनमा भन्दा यसपटक ४९ हजार आठ सय ६९ बढी मतदाता थपिएका छन् ।

वि.सं. २०७४ सालको स्थानीय तह निर्वाचनमा जिल्लामा एक लाख ९४ हजार ४७१ मतदाता रहेका थिए । जिल्लाका मतदान केन्द्रमा मतदान अधिकृत, सहायक मतदान अधिकृत, सहायक, सहयोगी र अन्य गरी २ हजार ३७६ जनशक्ति परिचालन गरिने भएको छ । निर्वाचनका लागि २९७ मतदान अधिकृत, २९७ सहायक मतदान अधिकृत, ५९४ सहायक, २९७ सहयोगी परिचालन गरिने भएको छ । त्यसका साथै मतदान केन्द्रमा ८९१ कर्मचारी नियुक्त गरिएको छ ।

यस्तै, मतदान स्थलको सुरक्षा तथा मतदातालाई सुरक्षित, भयरहित वातावरणमा मतदान गर्ने वातावरण मिलाउन जिल्ला प्रहरी कार्यालयको नेतृत्वमा सुरक्षा व्यवस्था मिलाइएको प्रमुख जिल्ला अधिकारी विश्वप्रकाश अर्यालले बताए ।

मुख्य निर्वाचन अधिकृतको कार्यालयले सोमबारदेखि नै कर्मचारीलाई नियुक्तिपत्र समेत वितरण गरेको छ । निर्वाचनमा खटिने एक हजार ४८५ कर्मचारीलाई मुख्य निर्वाचन अधिकृतको कार्यालयबाट नियुक्ति र तलबभत्ता उपलब्ध गराइएको मुख्य निर्वाचन अधिकृत एवं जिल्ला न्यायाधीश हरिशचन्द्र ढुङ्गानाले जानकारी दिए ।

यस्तै, निर्वाचन कार्यालयले भौगोलिक दूरीले टाढा रहेका मतदान केन्द्रका कर्मचारीलाई सोमबार सामग्री उपलब्ध गराइएको थियो । कार्यालयका अनुसार सोमबार घिरिङ, ऋषिङ, देवघाट, बन्दिपुर, आँबुखैरेनी गाउँपालिका र भिमाद नगरपालिकाका मतदान केन्द्रमा खटिने कर्मचारीलाई सामग्री उपलब्ध गराएको थियो । व्यास, भानु, शुक्लागण्डकी नगरपालिका र म्याग्दे गाउँपालिकालाई मंगलबार सामग्री प्रदान गरिएको छ ।

निर्वाचन सामग्री बुझेपछि सुरक्षा निकायको निगरानीमा कर्मचारीलाई सम्बन्धित मतदान केन्द्रसम्म लैजाने व्यवस्था मिलाइएको छ । मतदान केन्द्रमा खटिने सबै कर्मचारी वैशाख २७ गते बेलुकासम्म सम्बन्धित मतदान केन्द्रमा पुगिसकेको छन् । मतदान केन्द्रमा पुगेपछि सम्बन्धित ठाउँका राजनीतिक दलसँग बैठक, मतदाता परिचयपत्र वितरण, मतदान केन्द्र निर्माण लगायतका काम गर्ने बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर