ऋषिङमा दुई पुल उद्घाटन, स्थानीय आवागमनमा सहजता
ऋषिङ : नयाँ वर्षको अवसर पारेर तनहुँको ऋषिङ गाउँपालिका–५ र ७ तथा ४ र ७ जोड्ने फलामे र झोलुङ्गे पुलको उद्घाटन गरिएको छ । गाउँपालिकाका अध्यक्ष राजेन्द्रकृष्ण श्रेष्ठले मंगलबार आयोजित एक कार्यक्रमबीच दुवै पुलको उद्घाटन गरेका थिए ।
वडा नं. ५ का वडाध्यक्ष बुद्धिमान रानामगरको सक्रियतामा एनजिओ नेटवर्क तनहुँले निर्माण सम्पन्न गरेका यी पुलहरू कुल ६६ लाख रुपैयाँ लागतमा बनेका हुन्। यसमध्ये एउटा पुल ३२ लाख र अर्को ३४ लाख रुपैयाँमा निर्माण गरिएको हो ।
उद्घाटन कार्यक्रम उपभोक्ता समितिका अध्यक्ष केशर बहादुर थापा र भो माया रानाको अध्यक्षतामा सम्पन्न भएको थियो। कार्यक्रममा नेकपा एमाले तनहुँका अध्यक्ष हरिराज कँडेल, नेपाली कांग्रेस तनहुँका सदस्य मोहन गिरिलगायत स्थानीय नागरिकहरूको उल्लेखनीय उपस्थिति रहेको थियो ।
नवनिर्मित पुलहरूले स्थानीयवासीको आवागमन सहज बनाउनुका साथै सामाजिक तथा आर्थिक गतिविधिमा समेत सकारात्मक प्रभाव पार्ने अपेक्षा गरिएको छ ।
