दुइ महिनामा तनहुँका ८२३ जनामा डेंगु संक्रमण
भञ्ज्याङ न्यूज
तनहुँमा असोज र कात्तिक महिनामा ८२३ जनामा डेंगु संक्रमण भएको पुष्टि भएको छ ।
डेंगु संक्रमण बढेसँगै निको हुनेको संख्या पनि बढ्दै गएका कारण अस्पतालमा भीड कम हुन थालेको स्वास्थ्य कार्यालय तनहुँका प्रमुख शंकरबाबु अधिकारीले बताए ।
उनले भने, ‘धेरैजसो डेंगु पोजेटिभका बिरामी आफ्नै घरमा बसेर आराम गरिरहेकाले पनि अस्पतालमा हुने भीडमा कमी आएको छ ।’
जिल्ला प्रहरी कार्यालय तनहुँमा कार्यरत ४० भन्दा बढी प्रहरीहरुमा पनि डेंगु संक्रमण भएको छ । कार्यालयमा प्रहरी जवानदेखि प्रहरी नायव निरीक्षक, प्रहरी निरीक्षक, प्रहरी नायव उपरीक्षकसम्मका व्यक्तिलाई डेंगु संक्रमण भएको प्रहरी नायव उपरीक्षक युवराज खड्काले जानकारी दिए ।
उनले भने, ‘मलाई पनि डेंगु संक्रमण भयो, शरीर निकै दुख्ने रहेछ, संक्रमण भएपछि १० दिन सुत्नुपर्यो तर अहिले निको भएको छ ।’
अस्पतालमा दैनिक दुइ सयको हाराहारीमा स्वास्थ्य परीक्षणका लागि मानिस आउने गरेको दमौली अस्पतालले जनाएको छ ।
डेंगुका बिरामीलाई प्रशस्त मात्रमा पानी पिउने र आराम गर्न सुझाव सल्लाह दिइएको अस्पतालका निमित्त प्रमुख डा दिवस ढकालले बताए । अस्पतालमा उपचारका लागि आउने बिरामीमध्ये दैनिक आठ/दश जनामा डेंगु पोजेटिभ देखिने गरेको डा ढकालले बताए ।
