तनहुँ प्रहरीद्वारा विभिन्न मुद्दाका ११ फरार प्रतिवादी पक्राउ
भञ्ज्याङ समाचारदाता
जिल्ला प्रहरी कार्यालय तनहुँले ११ फरार प्रतिवादीलाई विहीबार पक्राउ गरेको छ । बैकिङ कसुर, सवारी ज्यान, सम्बन्ध विच्छेद, जारी मुद्दा र नाता कायम मुद्धाका प्रतिवादीलाई पक्राउ गरिएको तनहुँ प्रहरीले जनाएको छ । बैकिङ कसुर मुद्दामा म्याग्दे गाउँपालिका-१ का चामबहादुर थापा पक्राउ परेका छन् । उच्च अदालत पाटनले वि.सं. २०७६ माघ १७ गतेको थापालाई दुइ लाख रुपैयाँ जरीवानाको फैसला सुनाएको थियो।
त्यस्तै सवारी ज्यान मुद्दामा भएको फैसलामध्ये आठ दिन कैद र दुइ हजार रुपैयाँ जरीवाना तिर्न बाँकी रहेका एक, सम्बन्धविच्छेद मुद्दामा फरार सात, जारी मुद्दामा एक र नाता कायम मुद्दाका एक प्रतिवादी पक्राउ गरिएको प्रहरी नायब उपरिक्षक युवराज तिमिल्सिनाले जानकारी गराएका छन् ।
पक्राउ गरिएका सबैलाई कैद तथा जरीवाना भुक्तानका लागि जिल्ला अदालतमा उपस्थित गराइएको छ । विभिन्न अपराध एवं मुद्दामा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगोसमेत तिर्न बाँकी भएका प्रतिवादीलाई पक्राउ गर्न तनहुँ प्रहरीले अभियाननै चलाएको छ ।
चोरी भएका ५ मोबाइल सम्बन्धित धनीलाई हस्तान्तरण
चोरी भएका मोबाइल खोजी गरी सम्बन्धित धनीलाई तनहुँ प्रहरीले हस्तान्तरण गरेको छ । बिभिन्न मितिमा बिभिन्न स्थानबाट हराएका तथा चोरी भएका ५ वटा मोबाइल बुझाइएको प्रवक्ता तिमिल्सिनाले जानकारी गराएका छन् । हराएका मोबाइलहरु खोजी गरी पाउँ भनी परेका निवेदनहरु उपर अनुसन्धानको क्रममा हराएका तथा चोरी भएका भनिएका मोबाइलहरु मध्ये हराएको २ महिना पछि विभिन्न कम्पनीका अन्दाजी ९१ हजार मूल्य बराबरका ५ थान मोबाइलहरु फेला पारी सम्बन्धित मोबाइल धनीलाई बुझाईएको तनहुँ प्रहरीले जनाएको छ ।
