तनहुँ प्राविधिक शिक्षालय भिमादमा निबन्ध लेखन प्रतियोगिता
भिमाद : तनहुँ प्राविधिक शिक्षालय, भिमादले प्राविधिक शिक्षा तथा व्यावसायिक तालीम परिषदको ३७औं परिषद दिवसको अवसरमा भिमाद नगर स्तरीय निबन्ध लेखन प्रतियोगिता गरेको छ । प्रतियोगितामा भिमाद नगरपालिकाभित्रका विभिन्न माध्यमिक विद्यालयका ९ जना विद्यार्थीहरुले सहभागिता जनाएका थिए ।
“प्राविधिक शिक्षा तथा व्यावसायिक तालिमको आवश्यकता र महत्व” विषयक निवन्ध प्रतियोगितामा विद्यार्थीहरूले प्राविधिक शिक्षा र तालिमको महत्त्व, यसको समाजमा पर्ने प्रभावको बारेमा आफ्ना विचार प्रस्तुत गरेका थिए ।
प्रतियोगितामा अरुणोदय माध्यमिक विद्यालय, भिमाद–२ की आयुशा थापा प्रथम, धर्म माध्यमिक विद्यालय, भिमाद–६ का अनुपा श्रेष्ठ द्वितीय र अमर भू.पू. सैनिक इङ्गलिस स्कुल, भिमाद–५ की डिम्पल थापा तृतीय भएका छन् ।
कार्यक्रमको मुल्याङ्कन भिमाद नगरपालिका योजना शाखा प्रमुख टेकावती ढकाल र जनज्योति क्याम्पसका उपप्राध्यापक लक्ष्मी श्रेष्ठले गरेका थिए ।
कार्यक्रममा शिक्षालयका प्रमुख प्रदीराज पौडेलले सहभागी सबै विद्यार्थीहरूलाई प्रमाणपत्र र पुरस्कार वितरण गरेका थिए । उनले भविष्यमा यस्ता कार्यक्रमहरूमा थप सहभागिता बढाउनका लागि विद्यार्थीहरूलाई प्रेरित गर्ने समेत बताएका छन् ।
उक्त कार्यक्रममा शिक्षालयका कृषि प्रशिक्षक कुसुम गौतमले सहजिकरण गर्दै प्रतियोगिताले विद्यालय र प्राविधिक शिक्षालय बीच राम्रो सम्बन्ध स्थापित गर्न महत्त्वपूर्ण भूमिका खेल्ने विश्वास व्यक्त गरेका थिए ।
