शिक्षा, अनुसन्धान, पठन संस्कृति र स्थानीय साहित्य प्रवर्द्धनका लागि क्याम्पस र प्रतिष्ठानबीच समझदारी
दमौली : तनहुँको आदिकवि भानुभक्त क्याम्पस र एकदेव आले स्मृति प्रतिष्ठान -एकदेव आले पुस्तकालय) बीच शिक्षा, अनुसन्धान, पठन संस्कृति तथा स्थानीय भाषा–साहित्यको प्रवर्द्धनमा सहकार्य गर्ने उद्देश्यले संस्थागत समझदारीपत्र (एमओयू)मा हस्ताक्षर गरिएको छ ।
व्यास नगरपालिका–१ विज्ञानचौरस्थित आदिकवि भानुभक्त क्याम्पस र व्यास नगरपालिका–३ दमौलीस्थित एकदेव आले स्मृति प्रतिष्ठानबीच शुक्रबार क्याम्पसका तर्फबाट सञ्चालक समितिका अध्यक्ष केशबहादुर सुनार र प्रतिष्ठानका तर्फबाट कार्यसमितिका अध्यक्ष मनुमाया श्रेष्ठले समझदारीपत्र आदान–प्रदान गरेका थिए ।
समझदारीपत्रमा क्याम्पसका तर्फबाट क्याम्पस प्रमुख महाप्रसाद हड्खले र प्रतिष्ठानका तर्फबाट कार्यसमितिका अध्यक्ष मनुमाया श्रेष्ठले हस्ताक्षर गरेका छन् ।
कार्यक्रममा क्याम्पस सञ्चालक समितिका उपाध्यक्ष श्रीराम कार्की, सहायक क्याम्पस प्रमुख डा. रामकुमार अधिकारी, विश्वेश्वर तिमल्सेना र बिमल गिरी, विज्ञान विभाग प्रमुख सागर न्यौपाने, प्रशासकीय अधिकृत वसन्ती थापा आले मगर तथा प्रतिष्ठानका महासचिव नेत्र रानाभाट र सचिव शिव सदाशंकरको उपस्थिति रहेको थियो ।
नेपालको संविधानले प्रत्याभूत गरेको शिक्षा, अनुसन्धान, भाषा, साहित्य, संस्कृति संरक्षण, सूचना तथा ज्ञानमा पहुँच र दिगो विकासका सिद्धान्तलाई आत्मसात् गर्दै दुवै संस्थाबीच दीर्घकालीन सहकार्यको आधार तयार गर्न समझदारी गरिएको क्याम्पस प्रमुख हड्खलेले जानकारी गराए ।
समझदारीअनुसार दुवै संस्थाले पुस्तकालय स्रोत र सेवामा साझेदारी गर्ने, पठन संस्कृति तथा साक्षरता अभियान सञ्चालन गर्ने, ज्ञान र सांस्कृतिक सम्पदाको संरक्षण तथा प्रवद्र्धनमा सहकार्य गर्ने, तनहुँको स्थानीय भाषा र साहित्यसम्बन्धी परियोजनामा संयुक्त रूपमा काम गर्ने, समावेशी पुस्तकालय सेवा विस्तार गर्ने तथा अनुसन्धान प्रतिवेदन र डिजिटल सामग्री संयुक्त रूपमा प्रकाशन गर्नेछन् ।
समझदारीपत्र हस्ताक्षर भएको मितिदेखि लागू भई पाँच वर्षसम्म कायम रहनेछ । यस सहकार्यले तनहुँमा शैक्षिक, अनुसन्धानमूलक तथा सांस्कृतिक वातावरणलाई थप सुदृढ बनाउँदै उच्च शिक्षा संस्था र सामुदायिक पुस्तकालयबीचको सम्बन्धलाई नयाँ उचाइमा पु¥याउने विश्वास दुवै पक्षले व्यक्त गरेका छन् ।
