रोट्रर्याक्ट क्लब अफ दमौलीद्वारा बालबालिकालाई शैक्षिक सामाग्रि सहयोग
भञ्ज्याङ समाचारदाता/दमौली
तनहुँको व्यास-११ स्थित चण्डिका आधारभूत विद्यालयमा अध्ययनरत बालबालिकालाई रोट्रर्याक्ट क्लब अफ दमौलीले शैक्षिक सामाग्रि उपलब्ध गराएको छ । आठौं तनहुँ महोत्सवको अवसरमा आयोजित २ वटा कन्सर्ट कार्यक्रममा क्लबको तर्फबाट विक्रि गरिएको टिकट शुल्कबाट उठेको केही रकम विद्यालयका बालबालिकालाई पोशाक सहित शैक्षिक सामग्री सहयोग गरिएको हो ।
विद्यालयमा अध्ययनरत् ७० जना दलित, सिमान्तकृत र विपन्न परिवारका बालबालिकालाई झोला, सर्ट पाइट, जुत्ता, मोझा लगायतका विद्यालय पोशाक र कपि कलम लगायतका शैक्षिक सामग्री सहयोग गरिएको कार्यक्रम संयोजक एवं क्लबका इलेक्ट प्रेसिडेन्ट विशाल श्रेष्ठले बताए ।
उक्त टिकेट विक्रिबाट क्लबले पाएको ३५ हजार मुल्य बराबरको सामाग्री विद्यार्थीलाई सहयोग गरिएको उनले जानकारी दिए । सोही क्रममा विद्यालयका प्रधानाध्यापक सुरेन्द्र अधिकारीले प्राप्त सहयोगप्रति आभार व्यक्त गर्दै रोट्रर्याक्ट क्लबले उत्कृष्ट सामाजिक काम गर्दै आएको बताए ।
यस्तै, विद्यालय व्यवस्थापन समितिका अध्यक्ष निरबहादुर खड्काले जिल्लामा सामाजिक काम गर्ने धेरै संघसंस्था भएपनि हालसम्म कुनै पनि संस्थाबाट सहयोग प्राप्त नभएको बताए । विद्यालयमा पढ्ने प्रायः बालबालिकाको आर्थिक स्थिति कमजोर भएकाले धेरै समस्या भोग्दै आएको चर्चा गर्दै उनले क्लबको सहयोगले बालबालिकाको पठनपाठनमा ठुलो सहयोग पुग्ने विश्वास व्यक्त गरे ।
