विविध कार्यक्रम गरी तनहुँमा गणतन्त्र दिवस मनाइने
दमौली : गणतन्त्र दिवस तनहुँमा विविध कार्यक्रम गरी मनाइने भएको छ । जिल्लास्तरीय गणतन्त्र दिवस समारोह समितिको बैठकले दिवसका अवसरमा विविध कार्यक्रम आयोजना गर्ने निर्णय गरेको हो ।
जसअनुसार जेठ १४ गते गणतन्त्र दिवस विशेष रेडियो परिसंवाद, विशेष समाचार र सम्पादकीय प्रशारण प्रकाशन, सम्बन्धित धार्मिक संस्थाको संयोजनमा विभिन्न मठमन्दिर, गुम्बा, मस्जिद, चर्च लगायतका स्थानमा पूजापाठ तथा प्रार्थना गर्ने, तनहुँ उद्योग वाणिज्य संघ र व्यास १, २, ३ र ४ वडाको संयोजनमा महत्वपूर्ण सार्वजनिक स्थानमा सरसफाइ गरिने छ ।
यस्तै, जेठ १४ गते शिक्षा विकास तथा समन्वय इकाइ, व्यास नगरपालिका शिक्षा शाखा र सामाजिक विकास कार्यालयको संयोजनमा माध्यमिक विद्यालयस्तरीय वक्तृत्वकला प्रतियोगिता आयोजना हुनेछ ।
सोही दिन सामाजिक विकास कार्यालयको संयोजनमा जनज्योति माविमा बौद्धिक अपाङ्गता विद्यार्थीलाई पोशाक वितरण, व्यास नगरपालिकाको संयोजनमा अपाङ्गता भएका विद्यार्थीलाई शैक्षिक सामग्री वितरण गरिनेछ ।
जेठ १५ गते जिल्ला समन्वय समिति र व्यास नगरपालिकाको संयोजनमा राष्ट्रिय गान, झण्डोत्तोलन, सहिदहरुप्रति सम्मान कार्यक्रम, प्रभातफेरी, फलफूल वितरण, दीप प्रज्ज्वलन, नागरिक स्वास्थ्य परीक्षण हुनेछ ।
