व्यास नगरपालिकाले ५० जना क्षमताको आइसोलेशन सञ्चालन गर्ने

तनहुँको व्यास नगरपालिकाले ५० जना क्षमताको आइसोलेशन सञ्चालनमा ल्याउने भएको छ । नगरपालिकाले कृषि विकास बैंक दमौलीको भवनलाई आइसोलेसन बनाउने भएको हो । जिल्ला संकट व्यवस्थापन समितिको समेत सहमतिमा विहीबारबाट आईसोलेसन सञ्चालन गर्ने नगरपालिकाले तयारी गरेको छ ।

उक्त आईसोलेसनमा ५० जना राख्न मिल्ने गरी व्यवस्थापन मिलाइएको नगरप्रमुख बैकुण्ठ न्यौपानले बताएका छन् । उक्त आइसोलेशनमा घरमा बस्ने वातावरण नभएका, साथै विपन्न आर्थिक अवस्थाका संक्रमितलाई राखिने नगरप्रमुख न्यौपानले बताए ।

आईसोलेसनमै प्रारम्भिक परिक्षण र अक्सिजन समेतको सेवा दिइने र जटिल बिरामिहरुलाई अस्पतालसम्म पुर्‍याउनका लागि निःशुल्क एम्बुलेन्सको सुविधा समेत प्रदान गर्ने निर्णय भएको न्यौपानेले जानकारी दिए । साथै मृत्यू हुने संक्रमितको अन्तिम संस्कारको व्यवस्थापन समेतमा नगरपालिकाले तयारी गरिसकेको न्यौपानेले बताए । व्यासले संक्रमित सामान्य बिरामीलाई हरेक वडाको स्वास्थ्य फोकल व्यक्तिको निग्रानीमा होम आईसोलेसनमा राख्ने व्यवस्था समेत गरेको छ ।

नगरपालिकाले गएको हप्तादेखि हप्ताको दुइ दिन सोमबार र विहीवार पिसिआर परिक्षणको लागि निशुल्क स्वाब संकलनको व्यवस्था गरेको छ । व्यासमा दुइ हप्ता भित्र २८२ जनाको पिसिआर गरिएकोमा ४४ पुरुष र ४२ जना महिलामा संक्रमण पुष्टि भएको नगरपालिकाले जनाएको छ । यस अवधिमा संक्रमित मध्ये वडा नं १ बाट ३ जना र वडा नं १२ बाट एक जना गरी ४ जनाको मृत्यू भएको छ भने व्यासमा ४१ पुरुष र ३५ जना महिला गरी ७६ जना संक्रिय संक्रमित रहेका छन ।

सेयर गर्नुहोस्

प्रतिक्रिया दिनुहोस्

सम्बन्धित खवर