देवघाटको गौरवका योजना : प्रशासकीय भवनदेखि पशुपंक्षी फर्म, रंगशाला, अस्पताल गरी २२ वटा योजना छनौट

तनहुँको देवघाट गाउँपालिकाले आँठौं गाउँसभाबाट प्रशासकीय भवनदेखि पशुपंक्षी फर्म, रंगशाला, अस्पताल गरी २२ वटा गौरवका योजना छनौट गरी सार्वजनिक गरेको छ । आगामी आर्थिक बर्ष २०७८/७९ को नीति, कार्यक्रममा २२ वटा गौरबका योजना छनौट गरी बजेट समेत विनियोजन गरेको छ ।

गाउँपालिकाले नीति तथा कार्यक्रममा गाउँपालिकाको प्रशासकीय भवन, वडा कार्यालयको भवन निर्माणसंगै पशु पंक्षी विकास र्फम, कोटा रङ्गशाला, छरछरे झरना तथा पर्यटन विकास, खाल्टे रङ्गशाला, बाल उद्यान, घण्टाचुली भ्यू टवार, कोटाबैदी कृषि अनुसन्धान केन्द्र, जनजाति संग्राहलय लगायतका क्षेत्रको विकास तथा प्रवर्द्धनका लागि गौरवको योजनाका रुपमा छनौट गरिएको गाउँपालिकाका अध्यक्ष दुर्गबहादुर थापाले बताए ।

‘जनअपेक्षा तथा आवश्यकता, भौगोलिक बनावट, योजनाको प्राथमिकता, गाउँपालिकाको श्रोत साधन, आर्थिक, सामाजिक, पर्यटकीय सम्भावना लगायतका दृष्टिकोणले महत्वपूर्ण मानिएका योजनाहरुलाई गाउँपालिका गौरवका योजनाको रुपमा लिइएको छ’, अध्यक्ष थापाले भने, ‘छनौट गरिएको योजनालाई उपलब्ध श्रोत साधनको आधारमा बहुवर्षीय योजनाको रुपमा क्रमशः श्रोत साधनको व्यवस्था गरी सम्पन्न गरिनेछ ।’

कोटामा बन्ने पशु पंक्षी विकास र्फम, कोटा रङ्गशाला, छरछरे झरना तथा पर्यटन विकास, खाल्टे रंगशाला, खाल्टे पार्क तथा वाल उद्यान, घण्टाचुली भ्यू टावर पर्यटकीय स्थल, कोटवैदी कृषि अनुसन्धान केन्द्र,जनजाती संग्राहालय कर्ताप, ऐतिहासिक प्याउली गढी कर्ताप, ऐतिहासिक सिंच्याङ्ग गढी, देवघाट-साउने-कर्ताप सडक, गाईघाट-काफलडाँडा-छिपछिपे सानुभञ्ज्याङ्ग सडक गाउँपालिकाका गौरवका योजना हुन् ।

यस्तै, सुन्तला मार्ग, खाल्टे-मास्दीघाट सडक, देवघाट एकिकृत योजना, देवघाट गाउँपालिका अस्पताल, बाख्रा, सुन्तला, तरकारी, गाई पकेट क्षेत्र, सिंच्याङ्ग पार्लाङ्ग -साराङ्गघाट सोमेश्वर मार्ग, खानेपानी योजना, गाउँपालिका प्रशासकीय भवन, वडा नम्बर १ र ५ को वडा कार्यालय भवन, कोटा चण्डुली जामुने मोटर मार्ग समेत गाउँपालिकाको गौरवको योजनामा समावेश गरेको छन् ।

गाउँपालिकाका गौरवका योजनाहरु

गाउँपालिकाको नीति तथा कार्यक्रममा पूर्वाधार बिकासलाई प्राथमिकता दिईएको छ । संघीय सरकार, प्रदेश सरकार र आफ्नै लगानीमा मोटरेबल पुल, झोलुङ्गे पुल, सडक, प्रहरी चौकी भवन, खेलमैदान निर्माण गर्ने उल्लेख गरिएको छ ।

विश्वव्यापी रुपमा फैलिएको कोरोना नियन्त्रणलाई पनि गाउँपालिकाको नीति तथा कार्यक्रमले जोड दिएको छ । ‘कोभिड-१९ को निःशुल्क परीक्षण तथा उपचार गर्ने कार्यलाई पहिलो प्राथमिकतामा राखिनेछ’ गाउँपालिका अध्यक्ष थापाले बताए ।

स्वास्थ्य सेवा र्सवसुलभ र गुणस्तरीय बनाउन गाउँपालिका स्वास्थ्य नीति, कानून र मापदण्ड तर्जुमा गरिने जनाईएको छ । दातृ निकायहरुसँगको सहयोग तथा समन्वयमा एम्बुलेन्स खरिद गरी सञ्चालनमा ल्याउने समेत गाउँपालिकाले योजना बनाएको छ ।

गाउँसभामा अध्यक्ष थापाले गाउँपालिकाको सवल पक्ष, कमजोर पक्ष, अवसर, चुनौतीका विषयवस्तु समेत प्रस्तुत गर्दै चालु आर्थिक बर्षो नीति तथा कार्यक्रमको समिक्षा गरेका थिए ।

गाउँपालिकाको आन्तिरिक आम्दानीको श्रोत कम भएकाले प्राकृतिक श्रोत साधन र मानवीय पुँजी परिचालन गरी आर्थिक, सामाजिक, पूर्वाधार र सांस्कृतिक क्षेत्रको विकास गरी जनताको आयस्तर वृद्धि गर्ने लक्ष्य लिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर