देवघाटमा आयोजित श्रीमानलाई बोकेर दौडने प्रतियोगितामा अधिकारीको जोडी प्रथम
भञ्ज्याङ न्यूज
१११औं अन्तर्राष्ट्रिय नारी दिवसका अवसरमा तनहुँको देवघाट गाउँपालिकाले श्रीमतीले श्रीमानलाई बोकेर दौडिने प्रतियोगिता गरेको छ ।
गाउँपालिकाको वडा नं. ५ स्थित कालिका माध्यमिक विद्यालयको प्राङ्गणमा आयोजित प्रतियोगितामा विष्णु र पदम अधिकारीको जोडी प्रथम हुन सफल भएको छ ।
नारी दिवसका अवसरमा अन्य कार्यक्रमसंगै एक सय मिटर दुरीको जोडी दौड प्रतियोगिता पनि आयोजना गरिएकोमा १४ जोडीको सहभागिता रहेको गाउँपालिकाका अध्यक्ष दुर्गबहादुर थापाले बताए ।
उक्त प्रतियोगितामा गंगा गुरुङ र नवीन गुरुङको जोडी द्धितीय र सीता लामिछाने क्षेत्री र बमबहादुर थापा क्षेत्रीको जोडी तृतीय भएका छन् ।
शारीरिक र मानसिक रुपमा महिला पनि पुरुषसरह हुन्छन् भन्ने सन्देश दिने उद्देश्यका साथ यो प्रतियोगिताको आयोजना गरिएको अध्यक्ष थापाले बताए । प्रतियोगिताका विजेताहरुलाई शिल्ड र प्रमाणपत्रद्वारा पुरस्कृत गरिएको छ ।
