तनहुँको डुम्रेमा तपाईंको मास्क खै ? अभियान
भञ्ज्याङ समाचारदाता/डुम्रे
तनहुँको बन्दिपुर गाउँपालिकाको डुम्रेमा तपाईको मास्क खै ? अभियान शुरु गरिएको छ । पछिल्लो समयमा कोरोना संक्रमण जोखिम बढेको भन्दै तनहुँ उद्योग वाणिज्य संघ डुम्रे बजार इकाइ र इलाका प्रहरी कार्यालय भानु मुकाम डुम्रेले उक्त अभियान चलाएको हो । अभियान अन्तरगत आइतबार डुम्रेबजारमा स्वास्थ्य सचेतना जगाउँदै मास्क नलगाई हिंड्ने पैदलयात्री, सवारी साधनमा रहेका यात्रु लगायतका ५ सय जनालाई मास्क वितरण गरिएको इकाइ सभापति राजेश श्रेष्ठ राजुले जानकारी दिए ।
पहिलो चरणमा मास्क लगाउन अनुरोध गरिएको छ भने भौतिक दुरी कायम गर्न, सेनिटाइजरको प्रयोग गर्न र सरसफाईमा ध्यान दिंदै स्वास्थ्य मापदण्ड अनिवार्य रुपमा पालन गर्न सचेत गराइएको उनले बताए । यदि लापरवाहीजन्य कार्य गरेमा कारबाही गरिने इलाका प्रहरी कार्यालय भानु मुकाम डुम्रेका प्रहरी प्रमुख प्रहरी निरीक्षक प्रकाश भुषालले बताए । यस्तै, संघको डुम्रे बजार इकाइले इलाका प्रहरी कार्यालय भानु मुकाम डुम्रेलाई जस्तापाता प्रदान गरेको छ । बजारको सिसि क्यामेरा राखिएको स्थानका लागि भन्दै ८ हजार ५ सय रुपैंयाको जस्तापाता सहयोग गरेको इकाइले जनाएको छ ।
