बैरेनीमा एकिकृत बस्ती योजनाका लागि व्यासले गर्‍यो द्विपक्षीय ऋण सम्झौता

तनहुँको व्यास नगरपालिकाले वडा नं. १० को बैरेनीमा जग्गा एकीकरण विकास आयोजनाको लागि द्विपक्षी ऋण सम्झौता गरेको छ । नगरपालिकाले बुधबार नगर विकास कोष (एनसेट)संग बस्ती योजनाका लागि ऋण सम्झौता गरेको हो । नगरप्रमुख बैकुण्ठ न्यौपाने र नगर विकास कोष (एनसेट)का कार्यकारी निर्देशक कृष्णप्रसाद सापकोटाले हस्ताक्षर गरी ऋण सम्झौता गरेका छन् ।

उक्त आयोजनाको लागि नगर विकास कोषको ७० प्रतिशत र व्यास नगरपालिकाको ३० प्रतिशत लगानी हुने बताइएको छ । सम्झौता अनुसार कोषले नौ करोड दश लाख पचास हजार चार सय र अन्य रकम व्यास नगरपालिकाले ब्योर्हनुपर्ने प्रावधान रहेको छ ।

वि.सं. २०८० भित्र कार्य सम्पन्न गर्ने लक्ष्य लिइउको छ भने नगर विकास कोषसंग लिएको ऋण भुक्तानी गर्नुपर्ने अवधि छ वर्षको रहेको छ। नगरपालिकालाई कोषले बार्षिक ८ प्रतिशत ब्याजदर भुक्तानी गर्ने गरी ऋण लगानीमा सम्झौता गरेको छ ।

उक्त क्षेत्रको कूल एक हजार ५३७ रोपनीमध्ये पहिलो चरणमा २६१ रोपनी क्षेत्रफलमा एकिकृत बस्ती योजना गर्ने लक्ष्य रहेको आयोजना प्रमुख इन्जिनियर रबिन्द्र मुलले बताए । वि.सं. २०७७ माघ महिनामा नगर विकास कोषको प्राविधिक सहयोगमा बैरेनी जग्गा एकिकरण विकास आयोजनाको शुरुवात गरी विसं २०७८ फागुन २ गते राजपत्रमा आयोजना स्वीकृतिको सूचना प्रकाशित भएपछि प्रक्रिया अघि बढाइएको उनले जानकारी गराए ।

नगर विकास कोषका कार्यकारी निर्देशक कृष्णप्रसाद सापकोटाले संघीयताको अनुभूति गराउने गरी स्थानीय सरकार समक्ष आएर ऋण लगानी सम्झौता गरिएको बताए ।

एकिकृत बस्तीले गाउँर्फक अभियानमा सहयोग पुग्ने बिश्वास गर्दै उनले आयोजनाको निर्माण कार्य समयमा सम्पन्न गर्न उपभोक्ता समिति, समन्वय समिति र व्यास नगरपालिका लाग्नुपर्नेमा जोड दिए।

गाउँका बस्ती उजाड बन्दै गएको अवस्थामा शहरमा पनि व्यवस्थित शहर बनाउन आवश्यक देखिएकाले यस आयोजनालाई प्राथामिकता दिएर प्रक्रिया अघि बढाइएको व्यास नगरप्रमुख बैकुण्ठ न्यौपानेले बताए । उक्त आयोजना सम्पन्न गर्नसके व्यासको प्रतिष्ठा बढ्ने हुँदा जति सक्दो चाँडो निर्माण कार्य सम्पन्न गर्न सबैको सहयोगको अपेक्षा गरे ।

दमौली बजार, भादगाउँ क्षेत्र बस्तीले साँघुरीदै गएको अवस्थामा एकिकृत बस्ती बसाउन दीर्घकालिन सोचका साथ नगर विकास कोषसंग हातेमालो गदै नगरपालिका अघि बढेको नगरप्रमुख न्यौपानले बताए ।

कार्यक्रममा नगर विकास कोषका उप निर्देशक सूर्य बहादुर कार्की, कोषका उपप्रवन्धक राजेश कुमार भोछिमोया, भुकम्प प्रविधि राष्ट्रिय समाज नेपालका कार्यक्रम निर्देशक सुमन प्रधान, व्यास-१० का वडाध्यक्ष खेमराज पोखरेल, व्यास-२ का वडाध्यक्ष काशीराम श्रेष्ठ, व्यास-१३ का वडाध्यक्ष बसन्त बहादुर आले लगायतका वक्ताहरुले यस आयोजनाको सिकाईबाट व्यासका अन्य क्षेत्रमा पनि क्रमिक रुपमा एकीकृत बस्ती बिस्तार गर्दै लग्नुपर्नेमा जोड दिए ।

सेयर गर्नुहोस्

प्रतिक्रिया दिनुहोस्

सम्बन्धित खवर