आँवुखैरेनीको ऐनापहरामा आधुनिकपार्क निर्माण कार्य सुरु

तनहुँको आँबुखैरेनी गाउँपालिकास्थित प्रसिद्ध पर्यटकीयस्थल ऐनापहरामा आधुनिक पार्क निर्माण गर्न थालिएको छ । पृथ्वीराजमार्गको नजिकै रहेको ऐनापहरालाई थप व्यवस्थित बनाउन गाउँपालिकाले पार्क निर्माण सुरु गरेको हो ।

आँबुखैरेनी गाउँपालिका-२ र ४ को सिमानामा निर्माण गरिने पार्क मंगलबार गाउँपालिकाका अध्यक्ष शुक्र चुमानले शिलान्यास गरेका छन्। ऐनापहराको वरपर रहेका चट्टानमा आकर्षक देवीदेवताको मूर्ति निर्माण गर्न थालिएको उहाँको भनाइ थियो । पार्क निर्माणका लागि गाउँपालिकाले चालु आर्थिक वर्षमा रु एक करोड ४० लाख बजेट विनियोजन गरेको छ ।

‘ऐनापहरालाई तनहुँको मात्र नभइ गण्डकी प्रदेशकै उत्कृष्ट पर्यटकीय गन्तव्य बनाउने सोच राखेका छौं’, अध्यक्ष चुमानले भने, ‘सोही बमोजिम अहिले भइरहेको ठाउँलाई थप आकर्षण बनाउन काम सुरु भएको छ ।’ गण्डकी प्रदेशको प्रवेशद्वारमा रहेको ऐनापहरामा मनमोहक झरना छ ।

कलकल बगेको पानी, हरियाली जंगल र खोंचबाट झरेको पानीले यहाँ आइपुग्ने पुग्ने जो कसैको पनि मन लोभ्याउँछ । पृथ्वीराजमार्गबाट एक मिनेटको दूरीमा पुगिने यो झरना आकर्षक पर्यटकीयस्थलको रूपमा विकास हुँदै गएको हो ।

राजमार्ग भएर यात्रा गर्ने सर्वसाधारणका लागि विश्रामस्थलको रूपमा ऐनापहरा झरना विकास भइरहेको आँबुखैरेनी गाउँपालिका-३ का वडासदस्य मनोजकुमार श्रेष्ठले बताए । उनले भने, ‘काठमाडौं, चितवनबाट पोखरा जाने र पोखराबाट र्फकने सर्वसाधारण सवारीसाधन रोकेरै यस झरनामा रमाउने गरेका छन् ।’

यहाँ स्काइ साइक्लिकिङ र सिसाको पुल बनाउने योजना बनाइएको छ । गर्मी मौसमका बेला झरनामा नुहाउन, थकान मेटाउन, भिडिओ वा टिकटक बनाउन सर्वसाधारणको भीड लाग्न थालेको छ भने चिसो मौसममा यहाँ पुग्ने पर्यटकको चाप रहँदै आएको छ ।

छिम्केश्वरीको फेदीमा अवस्थित सिउँढी खोलाको पानी बगेर झरनामा मिसिएको छ । उक्त झरनालाई व्यवस्थित बनाउन गाउँपालिकाले तयार पारेको विस्तृत गुरुयोजना प्रतिवेदनमा रु दश करोड बजेट लाग्ने अनुमान गरिएको छ । उक्त ठाउँमा बुद्धको मूर्ति, रेलिङ, पार्किङलगायत संरचना निर्माण गरिने जनाइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर