आँवुखैरेनीमा घर तथा भवनको प्रस्तावित नक्शा निःशुल्क
भञ्ज्याङ समाचारदाता/आँवुखैरेनी
तनहुँको आँबुखैरेनी गाउँपालिकाले घर तथा भवनको प्रस्तावित नक्सा निःशुल्क बनाउने कामको सुरुवात गरेको छ । गाउँपालिकाले चालु आर्थिक वर्ष २०७९/०८० नीति तथा कार्यक्रम अनुसार घर तथा भवनको प्रस्तावित नक्सा निःशुल्क गर्ने घोषणा गरेबमोजिम मंगलबारदेखि निःशुल्क नक्सा वितरण सुरु गरेको हो ।
गाउँपालिकाको वडा नं. ३ निवासी मनमाया थापा र अनिता थापाले पहिलो पटक उक्त सेवा लिएका छन् । उनीहरुले घर निर्माणका लागि नक्सा बनाउन गाउँपालिकामा निवेदन दिएकामा गाउँपालिकाले नक्सा निर्माण गरी अध्यक्ष शुक्र चुमान र उपाध्यक्ष दुर्गा अर्यालले हस्तान्तरण गरेका छन् ।
नक्सा पास तथा भवनको मापदण्डमा रही नयाँ बन्ने घर तथा भवनको नक्सा गाउँपालिकाले नै निःशुल्क रुपमा बनाइदिने गाउँपालिकाका अध्यक्ष चुमानले बताए । चुमानका अनुसार तीन तल्लासम्मको लागि गाउँपालिकाले नै नक्सा बनाइदिनेछ । नक्सा पासका लागि लाग्ने आवश्यक राजस्व भने तिर्नुपर्नेछ ।
भवन ऐन २०५५ को दफा ८ (ग) अनुसारको (ग वर्गका भवनहरु) भुइँ तलाको क्षेत्रफल १००० वर्गफिटसम्म र उचाई ३ तलासम्म वा स्ट्रक्चलरल स्पान ४.५ मिटरभन्दा कम भएका भवनको हकमा लागु हुने गाउँपालिकाले जनाएको छ । नक्सा पास नगरी बनाइएका घर तथा भवनहरुमा यो सेवा सुविधा लागु नहुने जनाइएको छ ।
‘घर बनाउनका लागि नक्साका लागि सर्वसाधारणले अब बाहिर कन्सल्टेन्सी धाउनुपर्दैन, गाउँपालिकामा आएर सम्पर्क गरेपछि गाउँपालिकाले आवश्यक सबै काम गरिदिन्छ’, चुमानले भने, ‘कन्स्लटेन्सीमार्फत् नक्सा बनाउँदा कम्तिमा २५/३० हजार लाग्छ । निःशुल्क हुने भएपछि र्सवसाधारणको उक्त पैसा जोगिन्छ ।’
