थानीमाइमा ९१ फूलको डोली
तनहुँको भानु नगरपालिका-७ बसन्तपुरस्थित थानीमाइमा मंगलबार फूलको डोलीसहित पुगेका भक्तजनहरु । कात्तिक महिनाको तेस्रो मंगलबार ९१ फूलको डोली सहित करिब ८ हजार भक्तजन मन्दिरमा पूजाअर्चना तथा दर्शन गरेको थानीमाइ मन्दिर संरक्षण समितिले जनाएको छ ।
तनहुँ, कास्की, लमजुङ, गोरखा लगायतका ठाउँबाट सर्वसाधारण मन्दिरमा पुगेका थिए । त्यस्तै सोमबार राति जागाराम बसेर ५११ जनाले बत्ती बाल्नेका थिए । सोमबार सत्यनारायणको पूजा गरी फूलको डोली तयार गर्ने र थानीमाई मन्दिरमा फूलको डोली चढाउने परम्परा रहँदै आएको छ ।
मन्दिरमा साउन महिना, एकादशी र औंशी बाहेकका दिनमा पूजाअर्चना हुँदै आएको छ । प्रत्येक वर्ष कात्तिक, मंसिर, माघ र फागुन महिनाको मंगलबार थानीमाई मन्दिरमा देशका विभिन्न ठाउँबाट आएका भक्तजनले फूलको डोली चढाउने गर्दछन् ।
तस्विर : भञ्ज्याङ
