खर तथा फुसका छाना विस्थापन गर्दै भानु

तनहुँको भानु नगरपालिका कार्यालयले खर तथा फुसका छानालाई विस्थापन गर्न लागेको छ । नगरपालिकाले ‘नागरिक आवास कार्यक्रम’ अन्तर्गत खरका छाना विस्थापन गरी जस्तापाताले छाउन लागिएको हो ।

नगरपालिकामा रहेका ३३६ घरधुरीमध्ये दुइ सय घरपरिवारले जस्तापाताले छाना छाउनका लागि पहिलो र दोस्रो किस्ता बुझिसकेका नगरपालिका योजना शाखाका श्रवण श्रेष्ठले जानकारी दिए । उनका अनुसार ५० हजार रुपैयाँ मध्ये पहिलो किस्तामा ३० हजार र दोस्रो किस्ताबापत २० हजार रुपैयाा भुक्तानी गरिएको हो ।

तनहुँ क्षेत्र नं १ प्रतिनिधि सभासदस्य डा स्वर्णिम वाग्लेको पहलमा चालु आर्थिक वर्षमा एक सय लाभग्राही थप गरिएको नगरपालिकाले जनाएको छ । थप भएका आवासका लागि बजेट निकासा गरिदिनका लागि नगरपालिका कार्यालयले आयोजना कार्यान्वयन इकाइ पोखरालाई पत्र पठाइएको नगरप्रमुख आनन्द त्रिपाठीले बताए ।

खरका छाना मात्रै नभई विपन्न परिवारका जीर्ण जस्तापाता, पानी चुहिने र जस्ता फेर्न सक्ने क्षमता नभएका व्यक्तिलाई समेटिएकाले लाभग्राहीको संख्या बढेको नगरप्रमुख त्रिपाठीले बताए । चालु आवभित्र नगरपालिकालाई खर र फुसको छानामुक्त बनाउने योजनाअनुरुप काम भइरहेको उनले बताए ।

नगरपालिकामा चालु आवमा ५३६ योजना रहेका नगरप्रमुख त्रिपाठीले बताए । उनका अनुसार भौतिक पूर्वाधारतर्फ वडागत चार सय ७३, नगरस्तरीय ४९ र यसअघि ठेक्का आहृवान गरिएका १४ योजना गरी उक्त योजना रहेका हुन् ।

उक्त योजनामध्ये हालसम्म २३७ को लागत अनुमान तयार भई ५३ योजना सम्झौता भएका छन् । केही योजनाको कार्य सम्पन्न भई भुक्तानीको चरणमा रहेको नगरपालिका कार्यालयले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर