भानुका कृषकलाई उत्पादनका आधारमा अनुदान वितरण
भानु । तनहुँको भानु नगरपालिकाले किसान र कृषि क्षेत्रको प्रवर्द्धनका लागि उत्पादनमा आधारमा अनुदान वितरण कार्य थालेको छ । नगरभित्र पशुपालन गरेका किसानलाई उत्पादनका आधारमा अनुदान वितरण गरिएको छ । पालिकाको पशु विकास शाखाले वार्षिक कार्यक्रम अन्तर्गत घाँस खेती गर्ने, दुग्घ उत्पादन गर्ने र मासुका लागि पशुपालन गर्ने कृषकहरूको खातामा रकम अनुदान दिएको पशु विकास शाखाका प्राबिधिक अमित ढुंगानाले बताए ।
आर्थिक वर्ष २०८०÷८१ मा घाँस खेती विस्तार गरेका ३७ जना कृषकले १८५ रोपनीमा घाँस खेती गरेवापत ५ लाख ५५ हजार रुपैयाँ अनुदान पाएका छन् । प्रति रोपनी तीन हजार रुपैयाँका दरले उनीहरूले अनुदान पाएका हुन् ।
यस कार्यक्रम अन्तर्गत कृषकहरुले नयाँ प्रजातीका डाले तथा भुई घाँस बिस्तार गरेका छन । नगरकै लोकप्रिय कार्यक्रम बनेको हरियो घाँस विस्तार कार्यक्रम गत आर्थिक वर्ष ५ लाख ५६ हजार रुपैयाँ खर्च भएको प्राविधिक ढुंगानाले बताए । यस कार्यक्रम पश्चात पशुपालन क्षेत्रमा घाँसको परिपुर्ती गरी उत्पादन लागत कम हुने अपेक्षा गरिएको छ ।
यस्तै, नगरपालिकाले दुग्ध उत्पादनको आधारमा अनुदान दिन सुरु गरेको छ । नगरभित्रका २ वटा दुग्ध उत्पादन सहकारी मार्फत वापत ४ लाख २० हजार रकम अनुदान दिएको प्रमुख प्रशासकीय अधिकृत दिवाकर पौडेलले बताए । उत्पादनको आधारमा रहेको यो अनुदानले किसानलाई हौसला दिएको पौडेलको भनाई छ । प्रति लिटर ३ रुपैयाँका दरले किसानलाई अनुदान दिइएको र यो अनुदान कार्यक्रमले उत्पादनमा समेत वृद्धि भएको उनले बताए ।
पालिकाले एक वर्षमा १७२ वटा कुकुरको बन्ध्याकरण गरेको छ । कुकुरको संख्या बढ्दै गएको कुकुर बन्ध्याकरण गरिएको बताइएको छ ।
त्यस्तै मासु प्रवर्द्धन कार्यक्रम अन्तर्गत कृषकहरुलाई मासु उत्पादनको लागि पालेको बाख्रा, बंगुर, भेडा र पाडाहरूमा नगरपालिकाले अनुदान वितरण गरेको छ । कृषकहरुको फर्म, कृषक समूह र सहकारीमा नयाँ जन्मिएको बाख्राको पाठापाठीलाई प्रति गोटा ५००, बंगुरको पाठापाठी प्रति गोटा ३०० र भैसीको पाडालाई प्रती गोटा ८०० रुपैयाँका दरले ३० जना कृषकलाई ४ लाख ७४ हजार रुपैयाँ अनुदान उपलब्ध गरिएको छ ।
जसमा २ कृषि सहकारी र १ कृषक समुह सहित २७ वटा ब्यबसायीक पशुपालन फर्मलाई अनुदान वितरण गरिएको थियो । यस कार्यक्रमले भानुलाई मासुमा आत्मनिर्भर रहन र उत्पादकत्व बढाउन मदत गर्ने शाखा प्रमुख डा. सुशिल ऐरीले बताए ।
