दमौलीमा पृथ्वीजयन्ती एवं राष्ट्रिय एकता दिवस (फोटोफिचर)
दमौली : आधुनिक नेपालका निर्माता पृथ्वीनारायण शाहको जन्मजयन्ती आज विविध कार्यक्रम आयोजना गरी देशभर मनाइँदैछ ।
पृथ्वीनारायणको ३०३औँ जन्मजयन्ती तथा राष्ट्रिय एकता दिवसका अवसरमा तनहुँको दमौलीमा नेपाल ठकुरी समाज व्यास नगर इकाई दमौली र राष्ट्रिय प्रजातन्त्र पार्टी तनहुँले छुट्टाछुट्टै कार्यक्रम गरी मनाएका छन् ।
दिवसका अवसरमा पृथ्वीनारायण शाहका भनाई लेखिएका प्लेकार्ड बोकेर पञ्चेबाजासहित निकालिएको ¥यालीले दमौली बजार परिक्रमा गरिएको थियो ।
विसं १७७९ पुस २७ गते गोरखामा राजा नरभूपाल शाह र रानी कौशल्यावतीका कोखबाट पृथ्वीनारायण शाहको जन्म भएको थियो । विसं १७९९ चैत २५ गते पृथ्वीनारायण राजा भएका थिए ।
त्यसअघि नेपाल ५२ राज्यमा विभाजित थियो । पृथ्वीनारायण राजा भएपछि पूर्वमा टिस्टादेखि पश्चिममा चेपे नदीसम्म नेपालको सीमा बिस्तार गर्न उनि सफल भएका थिए ।
पृथ्वीनारायणको शेषपछि उनका उत्तराधिकारीले पश्चिममा किल्ला काँगडासम्म नेपाल राज्यलाई बिस्तार गरेको इतिहास छ ।
पृथ्वीनारायण शाहले विसं १८०१ मा नुवाकोट विजय गरेका थिए । त्यसको २५ वर्षपछि १८२६ सालमा काठमाडौँ उपत्यका विजय हासिल गरेका थिए ।
नेपाल उपत्यका विजय गरेपछि पृथ्वीनारायण शाहले पूर्वतिरका चौदण्डी विजयपुर आदि विजय गर्दै देशको सिमाना बढाएका थिए ।
सबै जातजाति, भाषाभाषीको सहयोग लिएर नेपाल एकीकरणको श्रीगणेश गरेका पृथ्वीनारायण शाहको सम्झनामा आज देशभर विभिन्न कार्यक्रम गरी ३०३ औँ जन्मजयन्ती मनाइँदैछ ।
तस्विर : नारायण खड्का/भञ्ज्याङ
