बन्दीपुरको पर्यटनमा नयाँ गन्तव्य थपिंदै, रामकोट प्रवर्द्धनको पहल
बन्दीपुर : तनहुँको बन्दीपुर गाउँपालिका–३ स्थित रामकोट गाउँको पर्यटन प्रवर्द्धन तथा विकासका लागि गाउँपालिकाले नयाँ पहल थालेको छ । रामकोटलाई पर्यटकीय गन्तव्यका रूपमा विकास गर्ने उद्देश्यले गाउँ कार्यपालिकाको बैठक बसेर आवश्यक छलफल गरिएको हो ।
बैठकले रामकोट गाउँको पर्यटन सम्भावना पहिचान गरी प्रचार–प्रसार तथा प्रवर्द्धनका कार्यक्रम अघि बढाउने विषयमा छलफल गरेको गाउँपालिकाले जनाएको छ । स्थानीय संस्कृति, जीवनशैली, प्राकृतिक सौन्दर्य र ग्रामीण परिवेशलाई पर्यटनसँग जोड्दै गाउँमा पर्यटकको आगमन बढाउने लक्ष्य राखिएको छ ।
यसैक्रममा बन्दीपुर गाउँपालिकाको टोलीले बन्दीपुर भिलेज सफारीमार्फत रामकोट गाउँ पुगेर स्थलगत अवलोकन तथा स्थानीयसँग छलफलसमेत गरेको छ । पर्यटन प्रवर्द्धनसँगै भिलेज सफारीको सेवा विस्तार र रामकोटलाई पर्यटन गतिविधिसँग जोड्ने विषयमा समेत छलफल गरिएको जनाइएको छ ।
गाउँपालिकाले रामकोटसँगै पालिकाभित्र रहेका ओझेलमा परेका अन्य होमस्टे तथा पर्यटकीय गाउँको समेत पहिचान गरी क्रमशः प्रचार–प्रसार र प्रवर्द्धन गर्ने जनाएको छ ।
स्थानीय पर्यटनको विकासमार्फत रोजगारीका अवसर सिर्जना गर्नुका साथै गाउँको आर्थिक गतिविधि बढाउने लक्ष्य गाउँपालिकाले लिएको छ । ग्रामीण पर्यटनलाई स्थानीय आयआर्जनसँग जोड्दै बन्दीपुरका नयाँ पर्यटकीय गन्तव्यलाई स्थापित गर्ने योजना अघि बढाइएको गाउँपालिकाले जनाएको छ ।
