मंसिर १४ गतेबाट तीन सिफ्टमा प्रत्यक्ष पठनपाठन सञ्चालन गर्ने सत्यवती माविको तयारी
- भञ्ज्याङ समाचारदाता (दमौली)
तनहुँको दमौली स्थित सत्यवती मध्यमिक विद्यालयले दिनको तीन सिफ्टमा विद्यार्थीको पठन पाठनलाई अगाडि बढाउने योजना बनाएको छ । विद्यालयका अभिभावकहरुसंग यो हप्ताभरी छलफल तथा अन्तरक्रिया गरी प्राप्त सुझाव अनुसार आगामि मंसिर १४ गतेबाट दैनिक तीन सिफ्टमा पठनपाठन गर्ने तयारी गरेको विद्यालयका प्रधानाध्यापक इन्द्रप्रसाद पौडेलले बताए ।
कोरोना भाइरस (कोभिड-१९) संक्रमण जोखिम कायमै रहेको अवस्थामा बालबालिकाको सिकाईलाई के कसरी निरन्तरता दिन सकिन्छ भन्ने विषयमा अभिभावकहरुसंगै अहिले नियमित छलफल र अन्तरक्रियामा रहेको उनले बताए ।
विद्यालयले कोरोना भाइरसका कारण हालसम्म सञ्चालन भएको अनलाइन कक्षा र अनलाइन सुविधाबाट बञ्चित विद्यार्थीहरुलाई विद्यालयमानै स्वास्थ्य मापदण्ड कायम गरी अध्ययन अध्यापन कार्यको समिक्षा गरिएको छ ।
आगामी दिनमा विद्यालयमानै प्रत्यक्ष रुपमा कक्षा सञ्चालन गर्ने विषयमा अभिभावकहरुको राय संकलन गरिएको र व्यास नगरपालिकाको शिक्षा समितिले तोकेको स्वास्थ्य सुरक्षा सामाग्रि र मापदण्ड पूर्ण रुपमा पालना गरी कक्षा सञ्चालन गर्ने तयारी विद्यालयले गरेको छ ।
विद्यालयका शिक्षक अभिभावक संघ अध्यक्ष रामचन्द्र सापकोटाको अध्यक्षतामा आयोजित अभिभावकहरुसंगको छलफलमा प्रधानाध्यपक इन्द्रप्रसाद पौडेल, सहायक प्रधानाध्यापक अनिल श्रेष्ठ र अशोक गिरीले सहजिकरण गरेका थिए ।
