भिमादको स्वास्थ्य संस्थाहरुको वार्षिक समिक्षा, उत्कृष्ट कर्मचारी र स्वास्थ्य संस्था पुरस्कृत
भिमाद : तनहुँको भिमाद नगरपालिका स्वास्थ्य शाखाले मातहत रहेका स्वास्थ्य संस्थाहरुको आर्थिक वर्ष २०८०/०८१ को वार्षिक समिक्षा गोष्ठी गरेको छ । नगरप्रमुख दधिराज सुवेदीको अध्यक्षतामा आयोजित गोष्ठीमा आधारभूत स्वास्थ्य केन्द्र, स्वास्थ्य चौकी, प्राथमिक स्वास्थ्य केन्द्रका इन्चार्जहरुले आफ्नो प्रस्तुति दिएका थिए ।
दुई दिनसम्म सञ्चालित गोष्ठीमा वडा तहमा भएका नविनतम प्रयासदेखि, स्वास्थ्यका सुचकको बर्तमान अवस्था, भएका कमजोरीदेखि लिनपर्ने आगामी रणनीतिका विषयमा छलफल गरिएको थियो । छलफल पश्चात स्वास्थ्य शाखा प्रमुख अनुराधा भट्टले पालिकाले लिने आगामी कार्यदिशाबारे सहजिकरण गरेकी थिइन् ।
यस्तै, उक्त कार्यक्रमका अवसरमा उत्कृष्ट कर्मचारी र संस्थालाई सम्मानित समेत गरिएको थियो । भिमाद प्राथमिक स्वास्थ्य केन्द्रका चिकित्सक डा. सबिन लम्साल, हेअ अनुशा ओलि, हेअ बिनोद कुमार मुखिया, अहेब हिरादेबी रानाभाट र कार्यालय सहयोगी बुद्धिमाया कुमाललाई सम्मानित गरिएको थियो ।
नगरपालिकाको उत्कृष्ट स्वास्थ्य संस्था भिमाद प्राथमिक स्वास्थ्य केन्द्र बनेको छ । तीन जनाको छनोट समितिले विभिन्न मापदण्ड बनाएर उत्कृष्ट कर्मचारी र स्वास्थ्य संस्था छनोट गरेको थियो । सम्मानित सबैलाई नगरप्रमुख सुवेदीले सम्मानपत्र प्रदान गरेका थिए ।
