नेपाल पत्रकार महासंघ तनहुँको अध्यक्षमा खड्का र अधिकारीको उम्मेदवारी
दमौली : नेपाल पत्रकार महासंघ अहिले २७औं महाधिवेशनको प्रक्रियामा अगाडि बढेको छ । नयाँ नेतृत्व चयनका लागि केन्द्र, प्रदेश हुँदै बुधबार जिल्लामा मनोनयन दर्ता गरिएको छ ।
तनहुँ जिल्लाको नेतृत्व दाबी गर्दै प्रेस चौतारीका पूर्व अध्यक्ष एवं नेपाल पत्रकार महासंघ तनहुँका पूर्वउपाध्यक्ष समेत रहेका नारायण खड्काले संगठनले गरेको निर्णयप्रति असन्तुष्टि जनाउँदै उम्मेदवारी दर्ता गरेका छन् । खड्काको उम्मेदवारीलाई प्रेस सेन्टरले साथ दिएको छ ।
प्रेस युनियन र प्रेस चौतारीको साझा उम्मेदवारका रुपमा धनपति अधिकारीले उम्मेदवारी दर्ता गराएका छन्। यस्तै, गठवन्धनबाट उपाध्यक्षमा प्रताप राना र प्र्रेस सेन्टरबाट सानेबहादुर नेपालीले उम्मेदवारी दर्ता गरेका छन् । महिला उपाध्यक्षमा गठवन्धनबाट सम्झना रसाइलीको उम्मेदवारी परेको छ ।
महासंघ तनहुँको सचिव पदमा गठवन्धनबाट कृष्णचन्द्र न्यौपाने र प्रेस सेन्टरबाट अस्मिता खनाल, सहसचिवमा प्रेस सेन्टरबाट बिनोद ढुंगाना र गठवन्धनबाट ऋषिकान्त दुवाडी उम्मेदवारी परेको छ भने कोषाध्यक्षमा गठवन्धनबाट पूर्ण विकेको एकल उम्मेदवारी परेको छ ।
यस्तै, खुल्ला सदस्यमा प्रेस सेन्टरबाट अशोक विश्वकर्मा र गठबन्धनबाट विकास खनाल, विष्णु गौतम, उपेन्द्र खनाल र राजेश्वर हड्खलेको उम्मेदवारी परेको छ । यता सह–सचिव (समावेशी)मा किरण श्रेष्ठ, महिला सदस्यमा सुनिता आचार्य, सदस्य (दलित) मुना कालीराज वि.के., सदस्य आदीवासी जनजाति) चित्र गुरुङ, सदस्य
(अन्य समावेशी) रामशरण नेपालीको एकल उम्मेदवारी परेको छ ।
त्यस्तै, संघीय परिषद सदस्य खुल्लामा प्रदीप काफ्ले, संघीय परिषद सदस्य (समावेशी) राजकुमार श्रेष्ठ(बिबि), प्रदेश परिषद सदस्य खुल्ला शंकरराज नहर्की, प्रदेश परिषद सदस्य (समावेशी मिला दरै र प्रदेश परिषद सदस्य (महिला)मा सुनिता थापाको एकल उम्मेदवारी दर्ता भएको छ ।
महासंघको जिल्ला, प्रदेश र केन्द्रको नयाँ नेतृत्व चयनका लागि मंसिर २८ गते शुक्रबारका दिन बिहान १० देखि दिउँसो ४ बजेसम्मा निर्वाचन हुँदैछ ।
