तनहुँको भानुका ५७ जना बालबालिकालाई स्वर्ण बिन्दु प्राशन गरियो
भानु : तनहुँको भानु नगरपालिकाको सुरानडिही नगर अस्पतालस्थित आयुर्वेद स्वास्थ्य शाखाले आइतबार ५७ जना बालबालिकाहरुलाई स्वर्ण विन्दु प्राशन गरिएको छ । आयुर्वेद विज्ञानमा आधारित यो एक जडीबुटी र खनिज औषधीको मिश्रण हो ।
अभिभावकहरुले आफ्ना बालबालिकालाई स्वास्थ्य रक्षाका निम्ति अर्थात शरीरको रोग प्रतिरोधात्मक शक्ति वृद्धि गर्न, मस्तिष्कको विकासमा सहायक गर्न, स्मरण शक्ति बढाउन, पाचन प्रणाली मजबूत बनाउन र मौसम परिवर्तन भै आउने सीजनल फ्लूज कम गराउन स्वर्ण विन्दु प्राशन गर्ने गरिएको प्रदेश आयुर्वेद चिकित्सालय दमौलीका वरिष्ठ कविराज निरीक्षक शम्भु चापागाईले जानकारी गराए ।
उनका अनुसार यो हरेक महिना पुष्य नक्षेत्रको दिन दिने गरिन्छ । सुन, मह, घ्यू तथा विभिन्न जडिबुटीहरुको प्रयोग गरी तयार पारिएको आयुर्वेदिक औषधी हो । कुनै समस्या विशेष भएका बच्चाहरुलाई नियमित खुवाउने पनि गरिन्छ ।
६ वर्ष मुनिका बालबालिकाहरुको रोगप्रतिरोधात्मक क्षमता बढाउनुका साथै शारीरिक, मानसिक एवं सर्वाङ्गिण विकासमा मद्दत गर्नका सार्थ श्वासप्रश्वास, स्मरण शक्ति बढाउने, पाचन प्रणाली सम्बन्धी रोगहरुमा लाभदायक हुने वरिष्ठ कविराज चापागाईले बताए ।
आयुर्वेदका विज्ञ चिकित्सकले सुरक्षित तवरले तयार पारिएको आयुर्वेदको औषधी भएको हुँदा चिकित्सक र आयुर्वेद स्वास्थ्यकर्मीको सल्लाहमा लिदा कुनै असर नहुने बताइएको छ । ज्वरो र वान्ताको समस्या भएका बालबालिकलाई भने यसको प्रयोग गर्नु नहुने र यसको प्रयोग पश्चात कुनै समस्या आएमा तुरुन्छ चिकित्सकसंग सल्लाह लिनुपर्ने उनले सुझाएका छन् ।
स्वर्ण विन्दु प्रासन आयुर्वेदको शास्त्रीय उपचार विधि हो । परापूर्वकालदेखि चलि आएको यो पद्धति आयुर्वेद स्नातक पढ्ने विद्यार्थिहरूको पाठ्यक्रममा पनि समावेश छ तर यो पद्धति तनहुँको पुरानडिही नगर अस्पतालको आयुर्वेद स्वास्थ्य शाखाले मात्रै गर्दै आएको छ ।
