भिमादको भानुमतीमा सामुहिक रुपमा अकबरे खुर्सानीखेती
भिमाद : तनहुँको भिमाद नगरपालिका–९ को भानुमति जौपानीका कृषकहरुले समुहिक रुपमा अकबरे खुर्सानीखेती गरेका छन् । मुख्यमन्त्री जलवायुमैत्री नमुना कृषक समूहमार्फत करिब १०० रोपनी क्षेत्रफलमा अकबरे खुर्सानीखेती गरिएको भानुमति कृषक समूहका अध्यक्ष इमान थापाले बताए ।
कृषि उत्पादन बढाई वडा नं. ९ का स्थानीय बासिन्दालाई आत्मनिर्भर बनाउन खुर्सानीखेती सुरु गरिएको उनले बताए । उनले भने, ‘सय रोपनी क्षेत्रफलमा करिब एक लाख अकबरे खुर्सानीको बिरुवा रोपिएको छ। खुर्सानीखेतीबाट किसानले वार्षिक दुई लाख ५० हजार केजी खुर्सानी उत्पादन गरी वार्षिक छ करोड २५ लाख रुपैयाँसम्म आम्दानीको लक्ष्य लिइएको छ ।’
यहाँ उत्पादन भएको खुर्सानी पोखरा, भिमाद, खैरेनीटारका बजारमा बिक्री गर्ने योजना छ । हाल बजारमा प्रतिकेजी ३०० देखि ५०० रुपैयाँ थोक मूल्य रहेको छ । खुर्सानीको बिरुवा उत्पादनका लागि वडा नं. ९ ले एक लाख रुपैयाँ अनुदान दिएको थियो ।
उक्त वडाका आठ वटा टोल मोहरीया, पाइमी, कटनछाप, पाथर्दी, थामडाँडा, सखेप, जौपानी र आस्पाग्दी भाडडाँडामा अकबरे खुर्सानी उत्पादनका लागि पकेट क्षेत्र बनाइने भएको छ । सो वडामा समुदायको आर्थिक वृद्धिका लागि अकबरे खुर्सानी सँगसँगै कफीखेतीका लागि पनि सम्भाव्यता अध्ययन भइरहेको बताइएको छ।
