आदिकवि भानुभक्त क्याम्पस र विद्यालयबीच सहकार्यका विषयमा अन्तरक्रिया
दमौली : तनहुँको दमौलीस्थित आदिकवि भानुभक्त क्याम्पस र छिमेकी विद्यालयबीच सहकार्य सम्बन्धमा बिहीबार अन्तरक्रिया गरिएको छ । ‘शैक्षिक उत्कृष्टताका लागि विद्यालय र क्याम्पसलाई जोडौँ’ भन्ने नारासहितको कार्यक्रममा व्यास नगरपालिकाका प्रमुख बैकुण्ठ न्यौपानेले क्याम्पससँग शैक्षिक तथा प्राविधिक स्रोत र जनशक्ति साझेदारीमार्फत विद्यालयहरूको गुणस्तरीय शिक्षा अभियान सशक्त हुने बताए ।
क्याम्पस सञ्चालक समितिका अध्यक्ष बुद्धिमान श्रेष्ठले जिल्लाका विद्यालयसँगको सहकार्य क्याम्पसको शैक्षिक उन्नतिका लागि अपरिहार्य रहेको उल्लेख गरे ।
क्याम्पस प्रमुख महाप्रसाद हडखलेले विद्यालयलाई शिक्षक तालिम, करियर काउन्सेलिङ, सूचना प्रविधि सहयोग, सांस्कृतिक आदानप्रदान र स्रोत साझेदारीका लागि क्याम्पस–विद्यालयबीच यमओयू गर्ने प्रस्ताव राखे ।
कार्यक्रममा सहभागी विद्यालय प्रधानाध्यापकहरूले विद्यालयको शैक्षिक विकास, मनोसामाजिक तथा पेशा परामर्श, छात्रवृत्ति सुविधा, र विज्ञान, अंग्रेजी तथा गणितमा जनशक्ति उत्पादनका लागि क्याम्पसले विशेष पहल गर्न सुझाव दिए ।
सहायक क्याम्पस प्रमुख विशेश्वर तिमलसेनाको अध्यक्षतामा आयोजित अन्तरक्रियामा व्यास नगरपालिका र म्याग्दे गाउँपालिकाका २५ विद्यालयका प्रधानाध्यापक सहभागी रहेको बिमल गिरीले जानकारी गराए ।
