वैशाख महिना यता कोरोना संक्रमणबाट तनहुँका १४ जनाको मृत्यु
भञ्ज्याङ न्यूज
नयाँ भेरियन्ट सहितको दोश्रो लहरको कोरोना भाइरस (कोभिड-१९) संक्रमण महामारिकै रुपमा फैलिएको छ । भाइरस संक्रमण तनहुँको समुदायस्तरमा भुषको आगो जस्तै गरी फैलिन पुगेको देखिएको छ ।
दैनिक संक्रमितको संख्या वृद्धि हुँदै गएको छ । भाइरस संक्रमणबाट मृतकको संख्या पनि बढ्दै गएको छ । जिल्ला स्वास्थ्य कार्यालय तनहुँको पछिल्लो तथ्याङ्क अनुसार वैशाख महिना यता तनहुँका १४ जनाको कोरोना भाइरस संक्रमणका कारण मृत्यु भएको छ ।
मृत्यु भएका अधिकांश व्यक्तिहरु दीर्घ रोगबाट पीडित रहेका र उनिहरुमा कोरोना संक्रमण हुँदा स्वास्थ्यमा गम्भिर समस्या देखिने गरेको स्वास्थ्य कार्यालय तनहुँका प्रमुख शंकरबाबु अधिकारीले बताए ।
यस्तै, पछिल्लो २४ घण्टामा तनहुँको दमौलीमा दुइ जनाको ज्यान गुमाएका छन् । शनिबार र आइतबार गरी दमौलीमा कोभिड संक्रमणका कारण ज्यान गुमाएका दुइ जनालाई नेपाली सैनिकले अन्त्येष्टि गरेको छ ।
यसरी ज्यान गुमाउनेमा व्यास-४ बागबजार निवासी ८० वर्षीया वृद्धा र व्यास-१३ निवासी वृद्ध छन् । दमौली अस्पतालमा उपचार पछि फर्केकी वृद्धाको शनिबार साँझ होमआइसोलेशनमा ज्यान गएको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोद विन्दु शर्माले जानकारी गराएका छन् ।
यस्तै, दमौली स्थित नेशनल एपोलो अस्पतालमा उपचारका लागि गएका व्यास-१३ का ९० वषर्ीय वृद्धको पनि निधन भएको उनले जानकारी गराएका छन् ।
दमौली मृत्यु भएकाको नेपाली सेनाले बुल्दीपारी दमौली शव दाहस्थलमा अन्त्येष्टि गरेको छ ।
त्यस्तै, घिरिङ गाउँपालिका-३ का ६४ वर्षीय कोरोना संक्रमित पुरुषको आइतबार पोखरा स्वास्थ्य विज्ञान प्रतिष्ठानमा उपचारको क्रममा निधन भएको प्रवक्ता डा. शर्माले जानकारी गराएका छन् ।
