घुस रकम सहित विद्युत कार्यालयका प्रमुख पक्राउ
भञ्ज्याङ न्यूज
घुस रकम सहित तनहुँका एक कार्यालय प्रमुख पक्राउ परेका छन् । नेपाल विद्युत प्राधिकरण तनहुँ वितरण केन्द्र आँबुखैरेनी प्र. शाखा कार्यालयका प्रमुख कृष्णबहादुर आले मगर घुस रकम सहित रंगेहात पक्राउ परेका हुन्।
आले मगरलाई अख्तियार दुरुपयोग अनुसन्धान आयोगको टोलीले मंगलबार ५ हजार रुपैयाँ घुस रकम सहित उनकै कार्यकक्षाबाट रङ्गेहात पक्राउ गरेको आयोगका सुचना अधिकृत मेघनाथ रिजालले जानकारी गराएका छन् ।
सोमबार एउटा गाडीले आँबुखैरेनी स्थित सडक छेउको एउटा विद्युत पोललाई ठक्कर दिई ढलाए पछि उक्त पुलको मर्मतका लागि अतिरिक्त शुल्क माग गरेको अधिकृत रिजालले बताए ।
उनले भने, ‘ढलेको विद्यतुको पोल मर्मत पश्चात बिलबाहेक अतिरिक्त रकम मगरले मागेका रहेछन्। गाडीवालाले धेरै रकम दिन नसक्ने भन्दै ५ हजार रुपैयाँ दिदै गरेको अवस्थामा उनलाई पक्राउ गरिएको हो ।’
मगरलाई हाल अख्तियारको टोलीले नियन्त्रणमा लिई एक महिनाभित्र अख्तियार दुरुपयोग अनुसन्धान आयोग काठमाडौंमा मुद्दा जाहेर गर्ने उनले बताए ।
