संसद पुनस्थापना हुँदैन : मन्त्री गुरुङ
- भञ्ज्याङ समाचारदाता (भिमाद)
गण्डकी प्रदेशका आर्थिक मामिला तथा योजनामन्त्री किरण गुरुङले संसद् पुनर्स्थापना नहुने दाबी गरेका छन् । अदालतले संसद् पुनस्थापना गरेमा अलोकतान्त्रिक हुने उनले बताएका छन् । तनहुँको भिमाद नगरपालिका-३ लोकतान्त्रिक मार्गमा रहेको बडुवा खोलामा निर्माण हुन लागेको पक्की पुलको आइतबार शिलान्यास गर्दै मन्त्री गुरुङले सरकार अनिर्णयको बन्दी हुने अवस्था आएपछि बाध्य भएर मध्यावधि निर्वाचन घोषणा गरिएको बताए ।
उनले पाँच वर्षसम्म काम गर्नलाई निर्वाचित गरिएको थियो । त्यो अवधिसम्म काम गर्न दिनुपर्छ । भागबन्डा खोजेर पार्टीबाट नै काम गर्न नदिएपछि बाध्य भएर सरकारले संसद् भंग गरेको स्पष्ट पारेका थिए ।
‘प्रधानमन्त्री केपी शर्मा ओलीले निर्वाचनको घोषणा गरेर जनताको नासो जनतालाई नै फिर्ता गरिएको हो’, उनले भने, ‘जनमतमा जानु लोकतान्त्रिक कदम हो ।’ उनले गण्डकी प्रदेश सरकार विघटन नहुने बताएका छन् ।
